समाचारहरू

कात्तिक १२ गते १ हजार ९ सय ५४ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ६२ हजार ३ सय ५४ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ८ हजार २ सय ४८ जनाको स्वाब परीक्षण गरिएको मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार कात्तिक १२ गतेसम्म ८ सय ८७ जना कोभिड–१९ सङ्क्रमितको मृत्यु भएको छ । सङ्क्रमितमध्ये १ लाख २१ हजार ८ सय २४ जना निको भएका छन् । कात्तिक १२ गते २ हजार ९ सय ८१ जना निको भएका छन् भने निको हुनेको दर ७५ प्रतिशत रहेको मन्त्रालयले जनाएको छ । ३९ हजार ६ सय ४३ जनाको उपचार भइरहेको छ । मन्त्रालयका अनुसार ३१ हजार ९ सय ३४ जनाको उपचार होम आइसोलेशनमा भइरहेको छ । २ सय ९० जनाको उपचार आइसीयूमा र ७२ जनाको उपचार भेण्टिलेटरमा भइरहेको छ ।

प्रदेश २
सप्तरी प्रतिनिधि मनोहरकुमार पोखरेलका अनुसार सप्तकोशी नगरपालिकाका जनप्रतिनिधि र स्वास्थ्यकर्मीसहित ३१ जनामा कोभिड–१९ सङ्क्रमण देखिएपछि नगरपालिकाको कार्यालय तथा मातहतका वडा कार्यालयहरूबाट प्रवाह हुने अत्यावश्यक सेवा बाहेकका सेवा कात्तिक १८ गतेसम्मका लागि बन्द गरिएको छ । नगर प्रमुख उत्तमकुमार शर्माद्वारा कात्तिक १२ गते जारी सूचनामा कात्तिक १८ गते सम्मका लागि सेवा बन्द गरिएको तथा वडा नम्बर १० र ११ लाई पूर्ण रूपमा लकडाउन तथा सील गरिएको जनाइएको छ ।

गण्डकी प्रदेश
तनहुँ जिल्ला प्रतिनिधि प्रकाशचन्द्र भट्टराईका अनुसार म्यादे गाउँपालिकाको कार्यालयका केही कर्मचारीमा कोभिड–१९ को सङ्क्रमण भएपछि गाउँपालिका कात्तिक १२ गतेदेखि कात्तिक १५ गतेसम्म बन्द गरिएको छ । कात्तिक १२ गतेबाट दशैबिदा सकिएपनि गाउँपालिकाका केही कर्मचारीमा कोभिडको सङ्क्रमण भएपछि असोज १५ गतेसम्म बन्द गरिएको गाउँपालिकाका प्रमुख प्रशासकीय अधिकृत नारयणप्रसाद अधिकारीले बताउनु भयो । सङ्क्रमित कर्मचारीको सम्पर्कमा आएका सबैको कन्ट्याक्ट ट्रेसिङ गरी स्वाब परीक्षण गर्न गाउँपालिका र सात ओटै वडा कार्यालयबाट प्रवाह हुने सेवा बन्द गरिएको प्रमुख प्रशासकीय अधिकृत अधिकारीले बताउनुभयो । गाउँपालिका र वडा कार्यालयहरूको सेवा आगामी कातिक १६ गतेबाट सञ्चालन गरिने अधिकारीले जानकारी दिनुभयो ।

अनलाइन डेस्क