समाचारहरू

वैशाख २४ गते ९ हजार २३ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ३ लाख ७७ हजार ६ सय ३ पुगेको स्वास्थ्य तथा जनसङ्ख्या मन्त्रालयले जनाएको छ । वैशाख २४ गते परीक्षण गरिएकामध्ये ४५ प्रतिशतमा कोभिड पुष्टी भएको भएपनि समग्रमा परीक्षण गरिएकामध्ये १४.५ प्रतिशतमा सङ्क्रमण पुष्टि भएको छ । वैशाख २४ गते १९ वर्ष मुनीका ८ सय ४ जनामा कोभिड सङ्क्रमणको पुष्टी भएको छ । गत २४ घण्टामा १९ हजार ९ सय ८७ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ९५ हजार ३ सय ९५ जना निको भएका छन् । वैशाख २४ गते २ हजार ९ सय ५ जना निको भएका छन् भने निको हुनेको दर ७८.२ प्रतिशत रहेको मन्त्रालयले जनाएको छ । वैशाख २४ गतेसम्म ३ हजार ५ सय ७९ जना कोभिड सङ्क्रमितको मृत्यु भएको मन्त्रालयले जनाएको छ । वैशाख २४ गते ५० जनाको मृत्यु भएको मन्त्रालयले जनाएको छ । आइसोलेशनमा पुष्टि भएका केसहरूको सङ्ख्या भनी सङ्क्रमितको सङ्ख्या ७८ हजार ६ सय २९ देखाइएको छ । मोरङ, सुनसरी, झापा, धनुषा, पर्सा, काठमाडौँ, ललितपुर, भक्तपुर, चितवन, काभ्रेपलाञ्चोक, मकवानपुर, धादिङ, नुवाकोट, कास्की, दाङ, बाँके, रुपन्देही, पाल्पा, बर्दिया, कपिलवस्तु, सुर्खेत र कैलालीमा सक्रिय सङ्क्रमित ५ सयभन्दा बढी रहेका छन् । गृह मन्त्रालयका अनुसार वैशाख २४ गते साँझसम्म ६२ जिल्लामा पूर्ण तथा आंशिक निषेध आदेश जारी गरिएको छ ।

महोत्तरी प्रतिनिधि अजयकुमार साहका अनुसार कोभिड महामारीको पहिलो चरणको बेला करोडौँ रुपियाँ खर्च गरेर जडान गरिएको महोत्तरीको जलेश्वर अस्पतालको उपकरण प्रयोगविहीन बनेको छ । जलेश्वर अस्पतालले भेण्टिलेटर सहितको पाँच बेडको आइसियू सञ्चालनमा ल्याएको छ । प्रदेश २ सरकारको सामाजिक विकास मन्त्रालयको आर्थिक सहयोगमा पाँच बेडको भेण्टिलेटर सेवा सुरु भएको हो । भेन्टिलेटर राखिए पनि दक्ष जनशक्ति अभावले सबै उपकरण प्रयोगविहीन अवस्थामा बनेको हो । प्रदेश सरकारले गत वर्ष कोभिड महामारीको पहिलो लहरकै बेला जलेश्वरस्थित जिल्ला अस्पताललाई कोभिड विशेष अस्पताल रूपमा विकास गर्न ८ करोड रुपियाँ लगानी गरी उपकरण तथा भौतिक पूर्वाधार तयार गरे पनि जनशक्ति अभावमा ती उपकरण प्रयोगविहीन भएपछि सङ्क्रमितहरू उपचारका लागि भौतारिन बाध्य छन् ।
कोभिड नियन्त्रण र उपचारमा सहजताका निम्ति ५० शैयाको कोभिड विशेष अस्पताल सञ्चालन गर्न २ करोड ५५ लाख ५२ हजार रुपियाँको लागतमा पाँच थान भेण्टिलेटर, शैया, मनिटर, इको लगायतका आइसियू सेटका उपकरण जडान गरिएको छ । अस्पतालका मेडिकल सुपरिटेण्डेण्ट डाक्टर शतिश साहले भन्नुभयो–‘गत वर्ष पनि कोभिड महामारीका बेलामा भेण्टिलेटर र आइसियू सञ्चालन गर्न दक्ष जनशक्ति नपाएर उपकरण प्रयोगमा ल्याउन सकिएन । वर्षभर नै ती उपकरणहरू प्रयोगविहीन बनेर थन्किए र यस वर्षको अवस्था पनि त्यस्तै छ ।’

बाँके प्रतिनिधि स्मृति देवकोटाका अनुसार कोभिडको बढ्दो सङ्क्रमणले गर्दा बिरामीको चाप बढेपछि बाँके जिल्लामा अक्सिजन अभाव भएको कोभिड फोकल पर्सन तेज वलीले बताउनुभयो । उहाँले अक्सिजन अभावको समस्या समाधान गर्न स्थानीय प्रशासन र स्थानीय तहसँग समन्वय गरेर काम गरिरहेको बताउनुभयो । अक्सिजन अभाव भएपछि नेपालगन्ज मेडिकल कलेज नेपालगन्जले कोभिडका थप बिरामी भर्ना नलिने विज्ञप्तिमार्फत जानकारी दिएको छ । नेपालगन्ज मेडिकल कलेज नेपालगन्जका प्रबन्ध सञ्चालक डाक्टर सुरेशकुमार कनोडियाले वैशाख २२ गते प्रेस विज्ञप्ति जारी गर्दै हाल उपचार भइरहेको बाहेक थप बिरामी भर्ना गर्न असमर्थ रहेको कुरा उल्लेख गरिएको छ ।
‘अस्पतालमा लिक्विड अक्सिजन ट्याङ्क, पिएसए अक्सिजन प्लान्ट, अक्सिजन सिलिण्डरबाट कोभिड बिरामीको उपचार भइरहेको थियो । तर, सबैभन्दा भरपर्दो लिक्विड अक्सिजन ट्याङ्क सकिएको र भारतबाट आउन नसकेकोले यस शिक्षण अस्पतालले हाल उपचार गराइरहेका बाहेक थप कोभिड बिरामी भर्ना गर्न असमर्थ रहेको कुरा दुःखका साथ सार्वजनिक रूपमा सबैलाई जानकारी गराउन चाहान्छौँ ।’–जारी विज्ञप्तिमा उल्लेख गरिएको छ । अस्पतालले अक्सिजन अभावका विषयमा यसअघि वैशाख १९ र २१ गते अक्सिजन आपूर्तिका लागि स्वास्थ्य तथा जनसङ्ख्या मन्त्रालयमा लिखित अनुरोध गरी अक्सिजन अभावका कारण अस्पतालमा ठूलो सङ्कट आउन सक्ने भन्दै जानकारी समेत गराएको विज्ञप्तिमा उल्लेख गरिएको छ ।

सुर्खेत प्रतिनिधि दुर्गा थापाका अनुसार वीरेन्द्रनगर नगरपालिकाले वैशाख २४ गतेदेखि २५ शैयाको कोभिड–१९ आइसोलेशन अस्पताल सञ्चालनमा ल्याएको छ । कर्णाली प्रदेशको राजधानी समेत रहेको वीरेन्द्रनगरमा बढ्दो सङ्क्रमण देखिएपछि वडा नम्बर ७ स्थित कटकुवा स्वास्थ्य चौकीको नयाँ भवनलाई अक्सिजन र एम्बुलेन्स सेवासहित कोभिड अस्पताल सञ्चालनमा ल्याएको नगर प्रमुख देवकुमार सुवेदीले बताउनुभयो । कर्णाली प्रदेश अस्पतासँग समन्वय गरी हाललाई दुई जना चिकित्सक सहितको स्वास्थ्यकर्मीको टोलीको व्यवस्थापन गरिएको र अस्पताललाई ५० शैयाको बनाउने कार्य पनि भइरहेको उहाँले जानकारी दिनुभयो ।

एक वर्षअघि

स्वास्थ्य तथा जनसङ्ख्या मन्त्रालयले ०७७ वैशाख २४ गते सम्म ९९ जनामा कोभिड-१९ पुष्टि भएको थियो ।

कोरोना भाइरसको सङ्क्रमणसम्बन्धी दैनिक अपडेट (२०७७ वैशाख २४ गते)

अनलाइन डेस्क