समाचारहरू

कात्तिक ८ गते २ हजार २ सय २५ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ५५ हजार २ सय ३३ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १३ हजार ८ सय ४६ जनाको स्वाब परीक्षण गरिएको मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार कात्तिक ८ गतेसम्म ८ सय ४२ जना कोभिड–१९ सङ्क्रमितको मृत्यु भएको छ । सङ्क्रमितमध्ये १ लाख ८ हजार ३ सय ३४ जना निको भएका छन् । कात्तिक ८ गते २ हजार ८ सय ४६ जना निको भएका छन् भने निको हुनेको दर ६९.८ प्रतिशत रहेको मन्त्रालयले जनाएको छ । ४६ हजार ५७ जनाको उपचार भइरहेको छ । मन्त्रालयका अनुसार ३२ हजार ८ सय ७३ जनाको उपचार होम आइसोलेशनमा भइरहेको छ । ३ सय ७ जनाको उपचार आइसीयूमा र ७० जनाको उपचार भेण्टिलेटरमा भइरहेको छ ।

कर्णाली प्रदेश
रुकुम (पश्चिम) प्रतिनिधि मनिषा केसीका अनुसार कोभिड–१९ को सङ्क्रमण बढ्न थालेपछि जिल्ला प्रशासन कार्यालय रुकुम पश्चिमले कात्तिक ७ गते साँझ ६ बजेदेखि अर्को सूचना जारी नभएसम्मका लागि बाँफिकोट गाउँपालिकाका चार ओटा वडामा निषेधाज्ञा जारी गरेको छ । पछिल्लो परीक्षणमा बाँफिकोटका तीन जना व्यक्तिमा कोभिड–१९ को सङ्क्रमण देखिएपछि जिल्ला प्रशासन कार्यालयले गाउँपालिकाका ४, ६, ७ र ८ नम्बर वडा सील गर्दै निषेधाज्ञा जारी गरेको हो ।
यी वडाहरुमा अति आवश्यक बाहेक अन्य आवतजावतलाई बन्द गरिएको जिल्ला प्रशासन कार्यालयले जनाएको छ । अर्को सूचना नभएसम्मका लागि अत्यावश्यक सेवा र साधनबाहेकका सम्पुर्ण सेवा बन्द गरिएको प्रमुख जिल्ला अधिकारी बद्रीनाथ गैह्रेले जानकारी दिनुभयो । उहाँका अनुसार शान्ति सुरक्षा, स्वास्थ्य, बिद्युत, दुरसञ्चार, खानेपानी, दुग्धजन्य पदार्थ, औषधी पसल, खाद्यान्न, ग्यास पेट्रोलियम पदार्थ लगाएतका सेवाहरु भने सावधानी अपनाएर सञ्चालन गरिनेछ । त्यस्तै एम्बुलेन्स, शव वाहन, झण्डावाल सवारी, अत्यावश्यक सेवा सञ्चालनमा खटिएका जनशक्तिले प्रयोग गरेका सवारी साधनहरु, सवारी अनुमति पास प्राप्त सवारी साधनहरू पनि संचालन हुने बताइएको छ ।
यसैबीच कोभिड–१९ को सङ्क्रमणको तीव बृद्धिदरलाई मध्यनजर गर्दै त्रिवेणी गाउँपालिकाको वडा नम्बर ७ पनि कात्तिक ५ गतेदेखि १२ गतेसम्मका लागि सील गरिएको छ । गाउँपालिकाले सूचना जारी गर्दै उक्त वडालाई सील गरिएको जनाएको हो । त्रिवेणी गाउँपालिका–७ कै ५३ वर्षीया एक महिलाको कात्तिक ५ गते कोभिड–१९ को सङ्क्रमणकै कारण होम आइसोलेशनमा मृत्यु भएको थियो ।

अनलाइन डेस्क