समाचारहरू

वैशाख २१ गते ७ हजार ५ सय ८७ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ३ लाख ५१ हजार ५ पुगेको स्वास्थ्य तथा जनसङ्ख्या मन्त्रालयले जनाएको छ । वैशाख २१ गते परीक्षण गरिएकामध्ये ४७ प्रतिशतमा कोभिड पुष्टी भएको भएपनि समग्रमा परीक्षण गरिएकामध्ये १३.८ प्रतिशतमा सङ्क्रमण पुष्टि भएको छ । वैशाख २१ गते १९ वर्ष मुनीका ६ सय २६ जनामा कोभिड सङ्क्रमणको पुष्टी भएको छ । गत २४ घण्टामा १६ हजार १ सय ३१ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ८७ हजार ७ सय ९० जना निको भएका छन् । वैशाख २१ गते १ हजार ७ सय ७५ जना निको भएका छन् भने निको हुनेको दर ८२ प्रतिशत रहेको मन्त्रालयले जनाएको छ । वैशाख २१ गतेसम्म ३ हजार ४ सय १७ जना कोभिड सङ्क्रमितको मृत्यु भएको मन्त्रालयले जनाएको छ । वैशाख २१ गते ५५ जनाको मृत्यु भएको मन्त्रालयले जनाएको छ । आइसोलेशनमा पुष्टि भएका केसहरूको सङ्ख्या भनी सङ्क्रमितको सङ्ख्या ५९ हजार ७ सय ९८ देखाइएको छ । मोरङ, सुनसरी, झापा, धनुषा, पर्सा, काठमाडौँ, ललितपुर, भक्तपुर, चितवन, काभ्रेपलाञ्चोक, मकवानपुर, कास्की, दाङ, बाँके, रुपन्देही, पाल्पा, बर्दिया, कपिलवस्तु, सुर्खेत र कैलालीमा सक्रिय सङ्क्रमित ५ सयभन्दा बढी रहेका छन् ।

उपत्यकामा एक साता थपियो निषेध आदेश

काठमाडौँ प्रतिनिधि बिमला पौडेलका अनुसार उपत्यकाका तीन जिल्ला काठमाडौँ, ललितपुर र भक्तपुरमा जारी निषेध आदेशको अवधि एक साता थपिएको छ । वैशाख २१ ग्ते उपत्यकाका तीन जिल्लाका प्रमुख जिल्ला अधिकारीहरूको संयुक्त बैठकले कोभिड  सङ्क्रमण बढ्दै आएको भन्दै वैशाख २९ गतेसम्म निषेध अदेश लम्ब्याउने निर्णय गरेको हो । बैठकले किराना तथा खाद्यान्न लगायतका पसल खोल्ने समय बिहान ७ बजेदेखि ९ बजेसम्म कायम गरेको काठमाडौँका प्रमुख जिल्ला अधिकारी कालिप्रसाद पराजुलीले जानकारी दिनुभयो । बैठकले सर्वसाधारणलाई अत्यावश्यक कामबाहेक घर बाहिर निस्कन पनि रोक लगाउने निर्णय गरेको पराजुलीको भनाई छ । उहाँका अनुसार यसअघि जारी भएका सबै सवारी पास खारेज गर्ने निर्णय समेत भएको छ । बैङ्क तथा वित्तीय संस्थाहरूले आफ्नो २५ प्रतिशत कार्यालय खोल्न पाउने र त्यहाँ २० प्रतिशत कर्मचारीले मात्रै काम चलाउनुपर्ने निर्णय भएको छ । बैठकले कवाडी सङ्कलनलगायत ठेला गाडा समेत सञ्चालनमा रोक लगाएको छ ।

एक वर्षअघि

स्वास्थ्य तथा जनसङ्ख्या मन्त्रालयले ०७७ वैशाख २१ गते सम्म ७५ जनामा कोभिड-१९ पुष्टि भएको थियो ।

कोरोना भाइरसको सङ्क्रमणसम्बन्धी दैनिक अपडेट (२०७७ वैशाख २१ गते)

अनलाइन डेस्क