समाचारहरू

कात्तिक ६ गते ३ हजार ६ सय ३७ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ४८ हजार ५ सय ९ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १५ हजार २ सय ५५ जनाको स्वाब परीक्षण गरिएको मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार कात्तिक ६ गतेसम्म ८ सय १२ जना कोभिड–१९ सङ्क्रमितको मृत्यु भएको छ । कात्तिक ६ गते मात्रै २१ जनाको मृत्यु भएको मन्त्रालयले जनाएको छ । सङ्क्रमितमध्ये १ लाख २ हजार ८ सय २० जना निको भएका छन् । कात्तिक ६ गते ३ हजार २ सय १५ जना निको भएका छन् भने निको हुनेको दर ६९.२ प्रतिशत रहेको मन्त्रालयले जनाएको छ । ४४ हजार ८ सय ७७ जनाको उपचार भइरहेको छ । मन्त्रालयका अनुसार ३१ हजार ४ सय ५४ जनाको उपचार होम आइसोलेशनमा भइरहेको छ । २ सय ९० जनाको उपचार आइसीयूमा र ७७ जनाको उपचार भेण्टिलेटरमा भइरहेको छ ।

बागमती प्रतिनिधि
रामेछाप प्रतिनिधि नवराज घिमिरेका अनुसार जिल्लामा कोभिड–१९ सङ्क्रमित बढ्दै गए पनि आइसीयू र भेण्टिलेटरको व्यवस्था नहुँदा सङ्क्रमित बिरामीको जीवन नै जोखिममा परेको छ । जिल्लामा पछिल्लो समय कोभिड–१९ का बिरामी दैनिक बढेका छन् । कात्तिक ६ गते मात्रै थप १५ जनामा कोभिड सङ्क्रमण पुष्टि भएको छ । योसँगै जिल्लामा कोभिड सङ्क्रमित हुनेको सङ्ख्या १ सय ५५ पुगेको छ । जसमध्ये अहिले सक्रिय सङ्क्रमितको सङ्ख्या ५६ जना रहेको स्वास्थ्य कार्यालय रामेछापका जनस्वास्थ्य अधिकृत भुवन थापाले बताउनुभयो । जिल्लामा विभिन्न स्थानीय तहका स्वास्थ्य चौकी तथा प्राथमिक स्वास्थ्य केन्द्र र अस्पतालमा १ सय ८ बेडका आइसोलेशन बनाइएका भए पनि त्यहाँ पर्याप्त उपचारको सुविधा छैन । जिल्लामा रहेका आइसोलेशनमा न आइसीयूको व्यवस्था छ न जिल्लाका कुनै अस्पतालमा भेण्टिलेटर नै छ । आइसीयू र भेण्टिलेटर नहुँदा कडा खालका सङ्क्रमितको उपचार जिल्लामा सम्भव नहुने प्रमुख जिल्ला अधिकारी रुद्रादेवी शार्माले बताउनुभयो । त्यस्ता बिरामीलाई धुलिखेल अस्पताल रिफर गर्ने गरिएको उहाँले बताउनुभयो । जिल्लामा आइसीयू र भेण्टिलेटर स्थापना तथा सञ्चालन गर्ने जनशक्ति महङ्गो पर्ने भएकोले हालसम्म स्थापना गर्न नसिकएको उहाँले बताउनुभयो ।
दोलखा प्रतिनिधि उद्धव पोखरेलका अनुसार दिन प्रतिदिन कोभिड–१९ को सङ्क्रमण बढ्दै गएपछि त्यसको नियन्त्रण र समुदाय स्तरमा फैलन नदिनका लागि भन्दै स्थानीय प्रशासनले कात्तिक ६ गते राति १२ बजेदेखि ६ दिनसम्मका लागि निशेधाज्ञा जारी गरेको छ । जिल्ला सङ्कट व्यवस्थापन समितिको बैठकले जिल्ला सदरमुकाम चरिकोटलगायत जिल्लाका मुख्य बजार क्षेत्रमा निषेधाज्ञा जारी गर्ने निर्णय गरेको जिल्ला समन्वय समिति दोलखाका प्रमुख डबल पाण्डेले जानकारी दिनु भयो । बैठकले जिल्लाभित्र यातायाताका साधानहरू भने आवश्यक सुरक्षा मापदण्ड पुरा गरी बिहान ७ बजेदेखि साँझ ६ बजेसम्म मात्र सञ्चालन गर्न दिने निर्णय गरेको छ । दशैँको बेला राजधानी काठमाडाँैलगायत अन्त्रबाट सङ्क्रमतिहरू गाउँ आउन सक्ने र सङ्क्रमण फैलाउने उच्च सम्भावना रहेकोले सावधानी अपनाउन र जिल्ला प्रवेश गरेकाहरू आआफ्नो घरमै एकहप्ता क्वारेण्टिनमा बस्ने वातावरणका लागि पनि निषेधाज्ञा जारी गरिएको जिल्ला प्रशासन कार्यालयले जनाएको छ ।

अनलाइन डेस्क