कोभिड–१९ को सङ्क्रमणसम्बन्धी दैनिक अपडेट (असोज १७ गते)

असोज १७ गते २ हजार १ सय २० जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या ८४ हजार ५ सय ७० पुगेको छ । गत २४ घण्टामा १२ हजार ९ सय ७८ जनाको स्वाब परीक्षण गरिएको स्वास्थ्य तथा जनसङ्ख्या मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार असोज १७ गतेसम्म कोभिड–१९ सङ्क्रमणका कारण ५ सय २८ जनाको मृत्यु भएको छ । सङ्क्रमितमध्ये ६२ हजार ७ सय ४० जना निको भएका छन् । असोज १७ गते २ हजार ४४ जना निको भएका छन् भने निको दर ७४.२ प्रतिशत रहेको मन्त्रालयले जनाएको छ । २१ हजार ३ सय २ जनाको उपचार भइरहेको छ । मन्त्रालयका अनुसार ११ हजार ५ सय २९ जनाको उपचार होम आइसोलेशनमा भइरहेको छ । २ सय १७ जनाको उपचार आइसीयूमा र ३१ जनाको उपचार भेण्टिलेटरमा भइरहेको छ ।

प्रदेश २

सिरहा प्रतिनिधि दुर्गा परियारका अनुसार सुखिपुर नपा—२ का ५५ वर्षीय पुरुषको कोभिड–१९ सङ्क्रमणबाट असोज १६ गते उपचारको क्रममा विराटनगरमा मृत्यु भएको जिल्ला स्वास्थ्य सेवा कार्यालयका प्रमुख कृष्णदेव यादवले बताउनु भयो । उनलाई ज्वरो आएपछि उपचारका लागि विराटनगरस्थित नोबेल अस्पतालमा असोज १२ गते भर्ना गरिएको थियो । असोज १३ गते स्वाब सङ्कलन गरी परीक्षण गर्दा असोज १६ गते रिपोर्ट पोजेटिभ आएको थियो । उनलाई थप उपचारको लागि आइशोलेसन अस्पताल लग्ने क्रममा एम्बुलेन्समै मृत्यु भएको थियो ।

बागमती प्रदेश

यस प्रदेशमा असोज १७ गते काठमाडौँमा १ हजार १, ललितपुरमा १ सय ९, चितवनमा ७५, भक्तपुरमा ६७, काभ्रेपलाञ्चोकमा ११, धादिङ र नुवकोटमा आठ/आठ, मकवानपुर र रामेछापमा ६/६, सिन्धुली र दोलखामा तीन/तीन र सिन्धुपाल्चोकमा दुई जना गरी १ हजार २ सय ९९ जनामा कोभिड–१९ सङ्क्रमणको पुष्टि भएसँगै सङ्क्रमित हुनेको सङ्ख्या ३३ हजार ७ सय ९६ पुगेको छ । जसमध्ये १९ हाजर ६ सय ५६ जना उपचारपछि निको भएका छन् भने १३ हजार ९ सय ३७ जनाको उपचार विभिन्न अस्पताल तथा आइसोलेशन सेन्टरमा भइरहेको छ । आज थप ६ जनाको मृत्यु भएको पुष्टि भएसँगै यस प्रदेशमा कोभिड–१९ सङ्क्रमणका कारण मृत्यु हुनेको सङ्ख्या २ सय ३ पुगेको छ ।

गण्डकी प्रदेश

नवलपरासी (बर्दघाट सुस्ता पूर्व) प्रतिनिधि तिर्थराज डुम्रेका अनुसार कोभिड–१९ को सङ्क्रमणबाट विनयी त्रिवेणी गाउँपालिकाका ३६ वर्षीय पुरुषको असोज १७ गते मृत्यु भएको छ । असोज १३ गते कोभिड–१९ को सङ्क्रमण पुष्टि भएका उनलाई असोज १७ गते खोकीसहित श्वासप्रश्वास तथा कलेजोमा समस्या भएपछि सोही दिन उनको उपचारका लागि भरतपुर अस्पताल चितवनको आइसियूमा भर्ना गरिएको थियो । असोज १७ गते दिउसो उपचारको क्रममा उनको मृत्यु भएको अस्पतालले जनाएको छ । यो सँगै जिल्लामा कोभिड–१९ को सङ्क्रमणबाट मृत्यु हुनेको सङख्या सात पुगेको जिल्ला स्वास्थ्य सेवा कार्यालयका प्रमुख केशवप्रसाद चापागाईंले बताउनुभयो ।


अनलाइन डेस्क