कोभिड–१९ को सङ्क्रमणसम्बन्धी दैनिक अपडेट (चैत ११ गते)

चैत ११ गते १ सय ४५ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ७६ हजार ३ सय ८९ पुगेको स्वास्थ्य तथा जनसङ्ख्या मन्त्रालयले जनाएको छ ।

गत २४ घण्टामा ३ हजार ९ सय ६३ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ७२ हजार १ सय ८७ जना निको भएका छन् ।

चैत ११ गते ९० जना निको भएका छन् भने निको हुनेको दर ९८.५ प्रतिशत रहेको मन्त्रालयले जनाएको छ । चैत ११ गतेसम्म ३ हजार २० जना कोभिड सङ्क्रमितको मृत्यु भएको मन्त्रालयले जनाएको छ । आइसोलेशनमा पुष्टि भएका केसहरूको सङ्ख्या भनी सङ्क्रमितको सङ्ख्या १ हजार १ सय ८२ देखाइएको छ ।

corona_1_year_data

कोभिड–१९ को सङ्क्रमणका कारण नेपालले लकडाउन गरेको एक वर्ष पुगेको छ । ०७६ चैत ११ गतेबाट लगाइएको लकडाउन पटकपटक थप गरी ०७७ साउन ७ गते अन्त्य गरिएको थियो ।

लकडाउन हटेपछि बजार पसल खुले । दशैँतिहार सकिएसँग शैक्षिक संस्था पुरानै लयमा खुलाइयो । सबै क्षेत्रमा चहलपहल बढ्यो । कोभिडको त्रास पनि घट्दै आयो । पछिल्लो समय सङ्क्रमण दर घट्दै आयो ।

तर, भारतसहित विश्वका विभिन्न देशमा कोभिडको दोस्रो लहर फैलिएसँगै नेपाल फेरि एक वर्ष अगाडिकै अवस्थामा जाने हो कि भन्ने त्रास बढ्न थालेको । कोभिड–१९ को दोस्रो लहर तीव्र गतिमा फैलिएपछि भारतका केही ठाउँमा लकडाउन लागू गरिएको छ ।

कोरोना कहरः सङ्क्रमणको जोखिम बढ्दै !

काठमाडौँ उपत्यकाका तीन जिल्लाले कोभिड-१९ को बढ्दो सङ्क्रमण रोकथामका लागि जनस्वास्थ्यका मापदण्डलाई कडाइका साथ पालना गर्ने निर्णय गरेका छन् ।

काठमाडौँ, ललितपुर र भक्तपुर जिल्ला प्रशासन कार्यालयले चैत ११ गते विज्ञप्ति जारी गर्दै सार्वजनिक स्थानमा मास्क नलगाउनेलाई सङ्क्रामक रोग ऐन, २०२० बमोजिम कारवाही गर्ने जनाएका छन् ।

चैत १५ र १६ गते होली पर्वलाई घरमै मनाउन समेत जिल्ला प्रशासनहरुले आग्रह गरेका छन् । काठमाडौँ उपत्यकामा सङ्क्रमणको जोखिम बढ्दै आएकाले सार्वजनिक स्थलमा भीडभाड नगर्न समेत उनीहरुले आग्रह गरेका छन् ।

कोरोना भाइरसः एक सातासम्मका लागि ‘लकडाउन’, उल्लङ्घन गरे ६ महिना कैद (२०७६ चैत ११ गते प्रकाशित समाचार)


अनलाइन डेस्क