समाचारहरू

कात्तिक ३ गते ३ हजार ७ सय ९० जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या १ लाख ३६ हजार ३६ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा १५ हजार ७ सय १४ जनाको स्वाब परीक्षण गरिएको मन्त्रालयले जनाएको छ । मन्त्रालयले जारी गरेको स्थिति प्रतिवेदन अनुसार कात्तिक ३ गतेसम्म ७ सय ५७ जना कोभिड–१९ सङ्क्रमितको मृत्यु भएको छ । सङ्क्रमितमध्ये ९४ हजार ५ सय १ जना निको भएका छन् । कात्तिक ३ गते २ हजार ३ सय ३५ जना निको भएका छन् भने निको हुनेको दर ६९.५ प्रतिशत रहेको मन्त्रालयले जनाएको छ । ४० हजार ७ सय ७८ जनाको उपचार भइरहेको छ । मन्त्रालयका अनुसार २६ हजार ९ सय २७ जनाको उपचार होम आइसोलेशनमा भइरहेको छ । २ सय ८२ जनाको उपचार आइसीयूमा र ६३ जनाको उपचार भेण्टिलेटरमा भइरहेको छ ।

प्रदेश १
झापा प्रतिनिधि नरेश खातीका अनुसार कोभिड–१९ को सङ्क्रमण न्यूनीकरणका लागि बुद्धशान्ति गाउँपालिका कात्तिक ३ गतेदेखि अत्यावश्यक बाहेकका सेवा बन्द गरेको छ । समुदायस्तमा कोभिड–१९ को सङ्क्रमण देखिएपछि न्यूनीकरणका लागि अत्यावश्यक बाहेकका सेवा अर्को सूचना जारी नहुञ्जेलसम्मका लागि बन्द गरिएको प्रशासकीय अधिकृत इन्द्रप्रसाद चापागाईंले बताउनु भयो ।
सुनसरी प्रतिनिधि जयकृष्ण यादवका अनुसार गढी र भोक्राहा नरसिंह गाउँपलिकाले कात्तिक ३ गते छुट्टाछुट्टै सूचना जारी गरेर कात्तिक ३ गतेदेखि ६ गतेसम्म गाउँपालिकाबाट प्रवाह हुने सेवा बन्द गरेका छन् । छिमेकी गाउँपालिका र नगरपालिकामा काभिड सङ्क्रमण उच्च रूपमा बृद्धि भएकाले गाउँपालिकाको कार्यालय बन्द गरिएको भोक्राहा नरसिंह गाउँपालिकाका अध्यक्ष महेन्द्रप्रसाद यादवद्वारा जारी सूचनामा उल्लेख गरिएको छ । गढी गाउँपालिकाका प्रमुख प्रशासकीय अधिकृत प्रमोदकुमार चौधरीद्वारा हस्ताक्षरित सूचनामा गाउँपालिका र ६ ओटै वडा कार्यालयसहित गाउँपालिकाको मातहतमा रहेका शाखा तथा निकाय बन्द रहने उल्लेख गरिएको छ । यसअघि इटहरी र धरान उपमहानगरपालिका, इनरुवा र रामधुनी नगरपालिका तथा कोशी गाउँपालिकाले बन्दको सूचाना जारी गरिसकेका छन् ।

अनलाइन डेस्क