समाचारहरू

माघ १२ गते ३ सय ३९ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ६९ हजार ७ सय ८९ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ४ हजार ८ सय ५८ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ६४ हजार ५ सय ३८ जना निको भएका छन् । माघ १२ गते ४ सय १ जना निको भएका छन् भने निको हुनेको दर ९८.१ प्रतिशत रहेको मन्त्रालयले जनाएको छ । माघ १२ गतेसम्म २ हजार ११ जना कोभिड सङ्क्रमितको मृत्यु भएको मन्त्रालयले जनाएको छ । ३ हजार २ सय ४० जना सक्रिय सङ्क्रमित रहेकामा २  हजार ५ सय ४ जना होम आइसोलेशनमा छन् । उपचाररतमध्ये १ सय ३७ जनाको उपचार आइसीयूमा र १९ जनाको उपचार भेण्टिलेटरमा भइरहेको छ । मन्त्रालयका अनुसार रुकुम पश्चिम, कालिकोट र मुगुमा सक्रिय सङ्क्रमित छैनन् भने काठमाडौँमा ५ सयभन्दा बढी सक्रिय सङ्क्रमित छन् ।

प्रदेश १

मोरङ प्रतिनिधि नेत्रप्रसाद अधिकारीका अनुसार अनुसार प्रदेश १, मा कोभिड–१९ विरूद्धको ९ हजार ६ सय भाइल खोप माघ १२ गते प्रदेश राजधानी विराटनगर आइपुगेको प्रदेश स्वास्थ्य आपूर्ति व्यवस्थापन केन्द्र विराटनगरका प्रशासकीय अधिकृत काशीराज पराजुलीले बताउनु भएको छ । स्वास्थ्य तथा जनसङ्ख्या मन्त्रालय स्वास्थ्य सेवा विभागले पहिलो चरणमा पठाएको ९ हजार ६ सय भाइल खोप प्रदेश १ का १४ र प्रदेश २ का सिरहा र सप्तरी जिल्लाका लागि आएको हो । प्रदेश १ का १४ जिल्लाका सरकारी तथा निजी अस्पतालका स्वास्थ्यकर्मी र कर्मचारी, महिला स्वास्थ्य स्वयम्सेविका गरी ३४ हजार ८ सय ५१ जना र १४ ओटै जिल्लाका ७ सय २५ सरसफाई कर्मचारी गरी ३५ हजार ५ सय ७६ जनालाई कोभिड–१९ विरूद्धको खोप लगाउने सरकारी तयारी छ । प्रदेश १ का सरकारी तथा निजी अस्पतालका स्वास्थ्यकर्मी र कर्मचारीहरुमा ताप्लेजुङका १४ हजार ३, धनकुटाका ८ सय ३१, उदयपुरका १ हजार २ सय ३७, भोजपुरका १ हजार १ सय ७६, मोरङका १२ हजार ५६, इलामका १ हजार ६ सय ९०, ओखलढुङ्गाका १ हजार ३ सय ६६, खोटाङका १ हजार ६ सय, झापाका ४ हजार ९ सय ७७, तेह्रथुमका ७ सय २३, सङ्खुवासभाका ९ सय ४९, सोलखुम्बुका ६ सय ८६, सुनसरीका ५ हजार २ सय ३३ र पाँचथरमा ९ सय २४ जनालाई खोप लगाउने प्रदेश सरकारले जनाएको छ ।

अनलाइन डेस्क