समाचारहरू

माघ ६ गते ३ सय ४८ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ६७ हजार ९ सय ९२ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ४ हजार ९ सय ५६ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ६२ हजार २ सय ९५ जना निको भएका छन् । माघ ६ गते ४ सय ४१ जना निको भएका छन् भने निको हुनेको दर ९७.९ प्रतिशत रहेको मन्त्रालयले जनाएको छ । माघ ६ गतेसम्म १ हजार ९ सय ६९ जना कोभिड सङ्क्रमितको मृत्यु भएको मन्त्रालयले जनाएको छ । ३ हजार ७ सय ६४ जना सक्रिय सङ्क्रमित रहेकामा २ हजार ८ सय ८० जना होम आइसोलेशनमा छन् । उपचाररतमध्ये १ सय ६१ जनाको उपचार आइसीयूमा र ३५ जनाको उपचार भेण्टिलेटरमा भइरहेको छ । मन्त्रालयका अनुसार सोलुखुम्बु, भोजपुर, नवलपरासी पश्चिम, रुकुम पश्चिम, कालिकोट र मुगुमा सक्रिय सङ्क्रमित छैनन् भने काठमाडौँमा ५ सयभन्दा बढी सक्रिय सङ्क्रमित छन् ।

बागमती प्रदेश

काठमाडौँ प्रतिनिधि विमला पौडेलका अनुसार त्रिवि शिक्षण अस्पतालमा कोभिड–१९ का कारण आइसीयूमा उपचाररत बिरामीको माघ ६ गते मृत्यु भएपछि उपचारमा लापरवाही भएको भन्दै डाक्टरमाथि कुटपिट भएको छ । अस्पताल प्रशासन र डाक्टरको लापरवाहीले बुबाको मृत्यु भएको भन्दै डाक्टर सविन भण्डारीलाई कुटपिट गरेको आरोपमा प्रहरीले मृतकका ३६ वर्षीय छोरालाई  गिरफ्तार गरेको महानगरीय प्रहरी परिसर काठमाडौँका एसएसपी अशोक सिंहले जानकारी दिनुभएको छ । आरोपितलाई थप अनुसन्धानको लागि महानगरीय प्रहरी वृत्त महाराजगञ्जमा राखिएको छ । बुटवलबाट थप उपचारका लागि कोभिड सङ्क्रमितलाई माघ ३ गते काठमाडौँ ल्याइएको थियो । अस्पतालमा निमोनियाको बिरामी भएको आधारमा उपचार भइरहेकोमा थप परीक्षणपछि उनलाई कोभिड–१९ कक्षमा स्थानान्तरण गरी उपचार भइरहेको अवस्थामा मृत्यु भएको थियो । मृतकका आफन्तले निमोनियाको बिरामीलाई कोभिड कक्षमा राखी उपचार गराएको भन्दै विरोध जनाएका थिए । घटनाको बारेमा मृतकका आफन्त र अस्पताल प्रशासनबिच छलफल चलिरहेको त्रिवि शिक्षण अस्पतालका निर्देशक दिनेश काफ्लेले जानकारी दिनुभयो ।

अनलाइन डेस्क