समाचारहरू

पुस २७ गते ४ सय ८८ जनामा कोभिड–१९ को सङ्क्रमण पुष्टि भएसँगै सङ्क्रमितको सङ्ख्या २ लाख ६५ हजार २ सय ८६ पुगेको स्वास्थ्य तथा जनसङ्ख्या मन्त्रालयले जनाएको छ । गत २४ घण्टामा ५ हजार ३ सय ९ ओटा नमूना परीक्षण गरेको पनि मन्त्रालयले जनाएको छ । सङ्क्रमितमध्ये २ लाख ५८ हजार ९ सय ६८ जना निको भएका छन् । पुस २७ गते ५ सय २७ जना निको भएका छन् भने निको हुनेको दर ९७.६ प्रतिशत रहेको मन्त्रालयले जनाएको छ । पुस २७ गतेसम्म १ हजार ९ सय २७ जना कोभिड सङ्क्रमितको मृत्यु भएको मन्त्रालयले जनाएको छ । ४ हजार ३ सय ७३ जना सक्रिय सङ्क्रमित रहेकामा १ हजार २ सय ३० जना होम आइसोलेशनमा छन् । उपचाररतमध्ये १ सय ६३ जनाको उपचार आइसीयूमा र ३७ जनाको उपचार भेण्टिलेटरमा भइरहेको छ । मन्त्रालयका अनुसार ताप्लेजुङ, सोलुखुम्बु र मुगुमा सक्रिय सङ्क्रमित छैनन् भने काठमाडौँमा ५ सयभन्दा बढी सक्रिय सङ्क्रमित छन् ।

सुदूरपश्चिम प्रदेश

बैतडी प्रतिनिधि नरी बडुका अनुसार सदरमुकामस्थित गढी क्षेत्र ११ दिनका लागि सील गरिएको छ । कोभिड सङ्क्रमणका कारण एकजना स्थानीयको मृत्यु भएपछि दशरथचन्द नगरपालिकाले वडा नं ४ को गढी क्षेत्र माघ ६ गतेसम्म सील गर्ने निर्णय गरेको हो । केही दिन अघिमात्रै गढी क्षेत्रमा एकजनामा मृत्युपछि कोभिड पुष्टि भएको उनको सम्पर्कमा रहेकाहरुमा पनि कोभिड देखिएकाले गढी क्षेत्र पुस २७ गतेदेखि माघ ६ गतेसम्म सील गर्ने निर्णय गरिएको प्रमुख प्रशासकीय अधिकृत विक्रमबहादुर चन्दले जानकारी दिनुभयो । दशरथचन्द नगरपालिकाको गढी क्षेत्रमै अहिले पनि सात जना सङ्क्रमित रहेकाले सङ्क्रमण नफैलियोस भन्नका लागि गढी क्षेत्र सील गरिएको हो । बैतडीमा अहिलेसम्म ६ सय ३६ जनामा कोभिड सङ्क्रमण पुष्टि भइसकेको छ भने कोभिडका कारण दुई जनाको मृत्यु भएको छ । जिल्लामा अहिले ३२ जना सक्रिय सङ्क्रमित रहेका स्वास्थ्य कार्यालयका प्रमुख योगेशप्रसाद भट्टले जानकारी दिनुभयो । दशरथचन्द नगरपालिकामा २१, पाटन नगरपालिकामा १० र दोगडाकेदार गाउँपालिकामा एक जना सक्रिय सङ्क्रमित रहेका छन् ।

अनलाइन डेस्क