समाचारहरू

कोभिड–१९ का कारण बन्द भएको सिन्धुली अस्पतालको शिशु आइसीयू ०७७ असोज १८ गतेदेखि  सञ्चालनमा आएको छ ।

हरेक महिना करिब १ सयको हाराहारीमा शिशु जन्मिने यो अस्पतालमा जन्मेका शिशुमा आउने जटिल स्वास्थ्य समस्यालाई मध्यनजर गरी चार बेडको आइसीयू सञ्चालनमा ल्याइएको बाल रोग विशेषज्ञ डाक्टर अभयचन्द्र यादवले बताउनु भयो ।

बाल विशेषज्ञ डाक्टर अभयचन्द्र यादवले जनशक्तिको अभाव र कोभिड १९ का कारण बन्द रहेको आइसीयू सञ्चालन भएपछि जिल्ला बाहिर रिफर गर्नुपर्ने शिशुलाई जिल्लामै उपचार गर्न सकिने बताउनु भयो ।

उहाँले अस्पतालले केही दिनमै प्रेयाडिक भेन्टिलेटर पनि ल्याउने तयारी गरेकाले शिशुहरूको उपचारका लागि काठमाडौँ रिफर गर्नुपर्ने अवस्था अन्त्य हुने विश्वास व्यक्त गर्नु भयो ।

डाक्टर यादवले भन्नु भयो– ‘काठमाडौँ पठाउनु पर्ने बाध्यता भएका शिशुलाई चार घण्टाको समय व्यवस्थापन गर्न नसकेर मृत्यु वरण गर्नुपर्ने अवस्थालाई रोक्न आइसीयू सञ्चालनले सहजता ल्याउने छ ।’

साथै, यसले कम तौल भएका, सङ्कट ग्रस्त, स्वास प्रस्वासको समस्या भएका, समय नपुगि जन्मेका र स्वास्थ्यमा जटिल समस्या आएका शिशुको उपचारका लागि सहजता ल्याउने समेत डाक्टर यादवले बताउनु भयो ।

यस अस्पतालमा जोखिमपूर्ण अवस्थाका मासिक करिब ६ शिशुको जन्म हुने गरेको छ । जसका लागि आइसीयुको आवश्यकता पर्दछ । आर्थिक वर्ष २०७६/७७ मा त्यस्ता ६५ ओटा केश आएको प्रसुति सेवाकी नर्स रामेश्वरी कायमलीले बताउनु भयो ।

उहाँका अनुसार अस्पतालमा एक वर्षको अवधिमा ९ सय ३१ जना महिला सुत्केरी भएकोमा १ सय ७१ जना महिलाले अप्रेशन सहितको सुत्केरी सेवा पाएका छन् ।

चालु आर्थिक वर्षको दुई महिनामा १ सय ९३ जना महिलाले प्रसुति सेवा पाएका छन् । जसमा १५ जना शिशुमा जटिल स्वास्थ्य समस्या देखिएको थियो । सिन्धुली अस्पतालमा अब दुई जना स्त्रीरोग विशेषज्ञद्वारा अप्रेशन सहितको सुत्केरी सेवा सञ्चालनमा रहेको छ ।

यस्तै कोभिड–१९ को अवधिमा मृगौलामा समस्या देखिएका १२ जना शिशुको सफल उपचार समेत गरिएको अस्पतालले जनाएको छ ।

बिमला पाण्डे