समाचारहरू

स्वास्थ्य तथा जनसङ्ख्या मन्त्रालयका अनुसार यो एक साताको अवधिमा २२ हजार २ सय ७६ ओटा स्वाब परीक्षण गर्दा ५ सय ४६ जनामा कोभिड–१९ को सङ्क्रमण देखिएको छ । एक सातामा ६ सय १९ जना सङ्क्रमित निको भए भने पाँच जनाको मृत्यु भएको पनि मन्त्रालयले जनायो ।

बागमती प्रदेश
यस प्रदेशमा चैत ९ गते कोभिड–१९ सङ्क्रमितको सङ्ख्या जम्मा १ लाख ५२ हजार १ सय ७८ जना पुगेको छ । अघिल्लो साता १ लाख ५१ हजार ७ सय ६५ जना कोभिड–१९ का सङ्क्रमित रहेकोमा यो साता ४ सय १३ जना सङ्क्रमित थपिएका छन् । यो साता अघिल्लो साताभन्दा ९१ जना कोभिड–१९ का सङ्क्रमित थप भएका हुन् ।
यस प्रदेशका कूल सङ्क्रमितमध्ये १ लाख ५० हजार ८ सय ३० जना निको भइसकेका छन् भने विभिन्न अस्पतालका आइसोलेशन तथा होम आइसोलेशनमा ३ सय ३२ जना उपचाररत छन् । अघिल्लो साता सक्रिय सङ्क्रमतिको सङ्ख्या ३ सय ५५ जना रहेकोमा यो साता २३ जना कम भई ३ सय ३२ जनामा झरेको हो ।
चैत ९ गतेसम्म मृत्यु हुनेको सङ्ख्या १ हजार १६ जना पुगेको छ । यो सङ्ख्या अघिल्लो साता भन्दा दुई जनाले मात्रै बढी हो । यस प्रदेशमा कोभिड–१९ बाट मृत्यु हुनेको दर ०.६७ प्रतिशत रहेको छ । अघिल्लो साता ३९.४० प्रतिशत महिला र ६०.६० प्रतिशत पुरुष सङ्क्रमित भएकोमा चैत ९ गते ३९.६० प्रतिशत महिला र ६०.४० प्रतिशत पुरुष सङ्क्रमित रहेका छन् ।
बागमती प्रदेशमा अघिल्लो साता देशको कूल सङ्क्रमणको सङ्ख्या ५४.७० प्रतिशत रहेकोमा चैत ९ गते आइपुग्दा ५५.१० प्रतिशत प्रतिशत पुगेको छ । यस प्रदेशमा कोभिड–१९ सङ्क्रमण पुष्टि भएका मध्येमा अघिल्लो हप्ता ९९.१० प्रतिशतको हाराहारीमा निको हुनेको सङ्ख्या रहेकोमा चौत ९ गते आइपुग्दा यो सङ्ख्या ९९.११ प्रतिशत पुगेको छ । कोभिड १९ को विरुद्ध पहिलो र दोस्रो चरणको खोप कार्यक्रममा लक्षको ६४ प्रतिशत मात्र पुरा भएको बागमती प्रदेश सामाजिक विकास मन्त्रालयले जनाएको छ ।

गण्डकी प्रदेश
गण्डकी प्रदेशमा चैत ३ गतेबाट चैत ९ गतेसम्म थप १ सय ४४ जनामा कोभिड–१९ सङ्क्रमण देखिएको छ । जसमध्ये १ सय ५ जना पुरुष र ३९ जना महिला रहेका छन् । योसँगै प्रदेशमा कुल सङ्क्रमितको सङ्ख्या १८ हजार ३ सय ४ पुगेको छ ।

लुम्बिनी प्रदेश
लुम्बिनी प्रदेशमा यो साता महिला ३५ जना र पुरुष ३८ जना गरी ७३ जनामा कोभिड–१९ को सङ्क्रमण पुष्टि भएको छ । यो साता सबैभन्दा बढी रुपन्देही जिल्लामा २३ जनामा सङ्क्रमण पुष्टि भएको छ । गत साता सङ्क्रमित हुनेको सङ्ख्या ७४ रहेको थियो । प्रदेश समाजिक विकास मन्त्रालय स्वास्थ्य निर्देशनालय बुटवलका अनुसार हालसम्म प्रदेशमा उपचारका लागि बाहिरबाट आएकासमेत गरी ४ सय ६ जनाको मृत्यु भएको छ । जसमध्ये रोल्पा, रुपन्देही र गुल्मीमा गरी तीन जनाले आत्महत्या गरेका थिए । भारतका महाराष्ट्र, मध्यप्रदेश र गुजरातमा कोभिडको सङक्रमण बढ्न थालेपछि चैत ४ गतेदेखि रात्रीकालिन कफ्र्यु जारी भइसकेको अवस्थामा भारतसँग सिमा जोडिएका नाकाहरूबाट नेपाल भित्रिने क्रम जारी भएको छ भने कोभिडको प्रकोप समेत बढ्नसक्ने जोखिम रहेको छ । सिमा नाकामा स्वास्थ्य कक्ष राखिएपनि चेक जाँच र क्वारेण्टाइनमा राख्ने कुनै जमर्को सरकारले नगरेको पाइएको छ ।

कर्णाली प्रदेश
कर्णाली प्रदेशमा पछिल्लो एक सातामा चार जना कोभिड–१९ बाट सङ्क्रमित भएका छन् । कर्णाली प्रदेश सामाजिक विकास मन्त्रालयका अनुसार हालसम्म प्रदेशमा ७ हजार ५ सय ७७ जनालाई कोभिड–१९ पुष्टि भएको छ । जसमध्ये ७ हजार ३ सय ९७ जना निको भएका छन् भने ३१ जनाको मृत्यु भएको छ । हाल आइसोलेशनमा रहनेको सङ्ख्या ६ रहेको छ ।

सुदूरपश्चिम प्रदेश
स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा चैत ३ गतेदेखि चैत ९ गतेसम्म दुई जना महिला सहित सात जनामा कोभिड–१९ को सङ्क्रमण पुष्टि भएको छ । यो साता अछाममा एक पुरुष र एक महिला, बैतडीमा एक महिला, बझाङमा एक पुरुष, कैलालीमा दुई पुरुष र कञ्चनपुरमा एक जना पुरुषमा सङ्क्रमण पुष्टि भएको हो । चैत ९ गते सुदूरपश्चिम प्रदेशका नौ जिल्लामध्ये कञ्चनपुर जिल्लामा मात्रै एक जना पुरुषमा कोभिड सङ्क्रमण पुष्टि भएको छ । यस सुदूरपश्चिम प्रदेशमा मृत्यु हुनेको सङ्ख्या ६७ जना पुगेको भएपनि यो साता कोभिडका कारण कसैको मृत्यु भएको छैन । हालसम्म सुदूरपश्चिम प्रदेशमा ३ हजार ९ सय २५ जना महिला र ११ हजार १ सय पुरुष गरी १५ हजार २५ जनामा कोभिड पुष्टि भएको छ । नेपाल सरकारले सञ्चालन गरेको पहिलो र दोस्रो चरणको कोभिड १९ विरुद्धको खोप अभियानमा सुदूरपश्चिम प्रदेशका १ लाख ४९ हजार ५ सय ७९ जनाले खोप लगाएका छन् ।

अनलाइन डेस्क