कोभिड–१९ः यो साता परीक्षण न्यून, थपिएकाभन्दा निको भएका सङ्क्रमित झण्डै ५ हजार बढी

 

अघिल्ला साताहरूको तुलनामा यो साता कोभिड परीक्षण न्यून भएको छ । यो साता ४९ हजार ६ सय ९७ ओटा स्वाब परीक्षण गरिएको स्वास्थ्य तथा जनसङ्ख्या मन्त्रालयले जारी गरेको अवस्था प्रतिवेदनमा उल्लेख छ । असोज अन्तिम साता मात्रै झण्डै १ लाखको हाराहारीमा परीक्षण गरिएको थियो । गत साता ७० हजार २ सय ७६ नमूना परीक्षण गरिएको पनि मन्त्रालयले जनाएको छ । गत साताको तुलनामा यो साता २० हजार ५ सय कम नमूना परीक्षण गरिएको छ । यो एक सातामा ११ हजार २ सय १३ जना सङ्क्रमित थपिएका छन् भने १५ हजार ७ सय ८७ सङ्क्रमित निको भएका छन् । कात्तिक २५ गते १ लाख ९९ हजार ७ सय ६० जना सङ्क्रमित भएकामा मङ्सिर १ गते कूल सङ्क्रमित २ लाख १० हजार ९ सय ७३ जना पुगेको स्वास्थ्य तथा जनसङ्ख्या मन्त्रालयले जनाएको छ । एक साताको अवधिमा ८२ जना कोभिड सङ्क्रमितको मृत्यु भएको छ । अघिल्लो साता १ सय २२ जना कोभिड सङ्क्रमितको मृत्यु भएको थियो । योसँगै मृत्यु हुनेको सङ्ख्या १ हजार २ सय ३० पुगेको छ । हालसम्म १६ लाख १३ हजार ९ सय ११ ओटा स्वाबको परीक्षण गरिएको छ । मङ्सिर १ गतेको तथ्याङ्क अनुसार कोभिड सङ्क्रमितमध्ये ८५ प्रतिशत सङ्क्रमित होम आइसोलेशनमा छन् ।

प्रदेश २
एक सातामा प्रदेश २ मा कोभिड सङ्क्रमित २ सय ७४ जना थपिएका छन् । अघिल्लो साता ४ सय ९० जना थपिएका थिए । कात्तिक २५ गते १९ हजार ६७ सङ्क्रमित रहेकामा मङ्सरि १ गते आइपुग्दा यो सङ्ख्या बढेर १९ हजार ३ सय ४१ पुगेको छ । एक सातामा थप चार जना सङ्क्रमितको मृत्यु भएको छ । प्रदेश २ मा मङ्सिर १ गतेसम्म १ सय ७१ जनाको मृत्यु भएको छ । एक सातामा ४ सय ८९ जना सङ्क्रमित सङ्क्रमण मुक्त भएका छन् ।

गण्डकी प्रदेश
गण्डकी प्रदेशमा कात्तिक २५ गतेबाट मङ्सिर १ गतेसम्म थप १ हजार ४ सय २३ जनामा कोभिड–१९ को सङ्क्रमण देखिएको छ । जसमध्ये ८ सय १ जना पुरुष र ५ सय ४२ जना महिला रहेका छन् । योसँगै प्रदेशमा कुल सङ्क्रमितको सङख्या ११ हजार १ सय ५१ रहेको छ । यो साता कोभिड–१९ को१ हजार १ सय २५ जना सङ्क्रमित निको भएका छन् । योसँगै प्रदेशमा निको हुनेको कूल सङ्ख्या ९ हजार ७० रहेको छ । हालसम्म प्रदेशमा कोभिड–१९ को सङक्रमणबाट कूल ७३ जनाको मृत्यु भएको छ जसमध्ये यो साता आठ जनाको मृत्यु भएको हो । स्वास्थ्य तथा जनसङ्ख्या मन्त्रालयको मङ्सिर १ गतेको तथ्याङ्क अनुसार प्रदेशमा हाल ३ हजार ७२ जना सक्रिय सङ्क्रमित रहेका छन् जसमध्ये कास्की र नवलपरासी (पूर्व) जिल्लामा ५ सयभन्दा बढी रहेका छन् । सक्रिय सङ्क्रमितहरूमध्ये १ हजार ९ सय ६७ जना होम आइसोलेशनमा छन् भने ७८ जना आइसीयू र दुई जना भेण्टिलेटरमा रहेका छन् । म्याग्दीको बेनीमा कात्तिक १४ गतेदेखि २५ गतेसम्म भएको लकडाउनपछि म्याग्दी उद्योग वाणिज्य सङ्घले कोभिड–१९ को सङ्क्रमणविरुद्ध जनचेतना थालेको छ ।

लुम्बिनी प्रदेश
लुम्बिनी प्रदेशमा कात्तिक २५ गतेदेखि मङ्सिर १ गतेसम्म ५ सय ३४ महिला र ९ सय ६७ पुरुष गरी जम्मा १ हजार ५ सय १ जनामा कोभिड सङ्क्रमण पुष्टि भएको छ । जसमध्ये तराईका जिल्लाहरूमा सबैभन्दा बढी रुपन्देहीमा १ सय ६६ महिला र २ सय ७१ पुरुष गरी ३ सय ३७ जना सङ्क्रमित भएका छन् भने कपिलवस्तुमा सबैभन्दा कम १८ महिला र ४४ पुरुष गरी ६२ जना सङ्क्रमित भएका छन् । यसैगरी पहाडी जिल्लाहरूमा सबैभन्दा बढी पाल्पामा ६१ महिला र ७८ पुरुष गरी १ सय ३९ जना सङक्रमित भएका छन् भने सबैभन्दा कम रोल्पामा सात जना महिला र २५ जना पुरुष गरी ३२ जना रहेका छन् । प्रदेशमा सबैभन्दा बढी सक्रिय सङ्क्रमित हुने जिल्लामा दाङ र रुपन्देही रहेका छन् ।

कर्णाली प्रदेश
कर्णाली प्रदेशमा मङ्सिर १ गतेसम्म ५ हजार ९ सय ५० जनामा कोभिड सङ्क्रमण पुष्टि भएको छ । जसमध्ये २ सय ८० जना सक्रिय सङ्क्रमति छन् । हालसम्म ५ हजार ६ सय ५६ जना निको भइसकेका छन् । कोभिड–१९ को सङ्क्रमणबाट यो साता थप एक जनाको मृत्यु हुँदा मृतकको सङ्ख्या १४ पुगेको छ । यो सातामा कर्णालीमा कोभिड सङ्क्रमित ८३ जना थपिएका हुन् ।

सुदूरपश्चिम प्रदेश
एक सातामा सुदूरपश्चिम प्रदेशमा कोभिड सङ्क्रमित ३ सय ५२ जना थपिएका छन् । कात्तिक २५ गते १० हजार ७ सय ११ सङ्क्रमित रहेकामा मङ्सिर १ गते आइपुग्दा यो सङ्ख्या बढेर ११ हजार ६३ पुगेको छ । एक सातामा यो प्रदेशमा मृत्यु हुनेको सङ्ख्या चार थपिएर ३१ पुगेको छ । एक सातामा १ सय ९९ जना सङ्क्रमित सङ्क्रमण मुक्त भएका छन् ।


अनलाइन डेस्क