समाचारहरू

यो साता कोभिड परीक्षण दैनिक ८ सय १६ जना कोभिड सङ्क्रमित थपिएका छन् भने १ हजार १ सय १३ जना निको भएका छन् । स्वास्थ्य तथा जनसङ्ख्या मन्त्रालयद्वारा जारी तथ्याङ्क अनुसार एक साताको अवधिमा ४२ हजार ५ सय ४७ ओटा स्वाब परीक्षण गरिएकामा ५ हजार ७ सय ९५ जनामा कोभिड पुष्टि भएको छ । यो एक सातामा ८८ जना कोभिड सङ्क्रमितको मृत्यु भएको पनि मन्त्रालयले जनाएको छ ।

प्रदेश १
स्वास्थ्य तथा जनसङ्ख्या मन्त्रालयका अनुसार मङ्सिर ३० गतेदेखि पुस ६ गतेसम्मको अवधिमा झापामा ४५ जना पुरूष र ४३ जना महिला गरी ८८ जनामा कोभिड–१९ को सङ्क्रमण पुष्टि भएको छ । त्यसैगरी सुनसरीमा ५५ जना पुरूष र ५२ जना महिला गरी एक सय सात जना, खोटाङमा एक जना पुरूष र एक जना महिला गरी दुुई जना, मोरङमा ९१ जना पुरूष र ८० जना महिला गरी १ सय ७१ जना, उदयपुरमा नौ जना पुरूष र दुई जना महिला गरी ११ जना, धनकुटामा एक जना पुरूष र एक जना महिला गरी दुई जना, इलाममा आठ जना पुरूष र १० जना महिला गरी १८ जना, पाँचथरमा चार जना पुरूष र एक जना महिला गरी पाँच जना, ओखलढुङ्गामा ६ जना पुरूष र एक जना महिला गरी सात जना, भोजपुरमा तीन जना पुरूष, सङ्खुवासभामा आठ जना पुरूष र तीन जना महिला गरी ११ जना, ताप्लेजुङमा १७ जना पुरूष र एक जना महिला गरी १८ जना, सोलुखुम्बुमा दुई जना पुरूष र एक जना महिला गरी तीन जना र तेहृथुममा दुई जना पुरूष र दुई जना महिला गरी चार जनामा कोभिड–१९ को सङ्क्रमण पुष्टि भएको छ । प्रदेश १ मा रहेका कोशी कोभिड–१९ अस्पताल, प्रदेश जनस्वास्थ्य प्रयोगशाला, वीपी कोइराला स्वास्थ्य विज्ञान प्रतिष्ठान घोपा प्रयोगशाला, मेची अस्पताल प्रयोगशाला, कोटीहोम प्रयोगशाला, नोवेल अस्पताल प्रयोगशाला, विराट अस्पताल प्रयोगशाला र न्यूरो अस्पताल प्रयोगशालामा गरिएको कोभिड–१९ को परीक्षणमा प्रदेश १ मा एक साताको अवधिमा प्रदेश १ मा ९ सय ४४ जनामा कोभिड–१९ को सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

प्रदेश २
एक सातामा प्रदेश २ मा कोभिड सङ्क्रमित ९५ जना थपिएका छन् । अघिल्लो साता ३ सय १५ जना थपिएका थपिएका थिए । मङ्सिर ३० गते २० हजार ४ सय ९३ सङ्क्रमित रहेकामा पुस ६ गते आइपुग्दा यो सङ्ख्या बढेर २० हजार ५ सय ८८ पुगेको छ । एक सातामा थप तीन जना कोभिड सङ्क्रमितको मृत्यु भएपछि प्रदेशमा मृत्यु हुनेको सङ्ख्या २ सय १० पुगेको छ । यो साता सक्रिय सङ्क्रमितको सङ्ख्या ५२ जना मात्रै रहेको स्वास्थ्य तथा जनसङ्ख्या मन्त्रालयले जनाएको छ ।

बागमती प्रदेश
यस प्रदेशमा पुस ६ गते कोभिड–१९ सङ्क्रमणको सङ्ख्या महिला ५४ हजार ८ सय ६१ जना र पुरुष ८४ हजार ३ सय ८० जना गरी जम्मा १ लाख ३९ हजार २ सय ४१ जना पुगेको छ । अघिल्लो साता १ लाख ३६ हजार ९ सय ६५ जना कोभिड–१९ सङ्क्रमित रहेकोमा यो साता २ हजार २ सय ७६ जना मात्र सङ्क्रमित थपिएका हुन् । यस प्रदेशका कूल सङ्क्रमितमध्ये १ लाख ३३ हजार ४ सय ९४ जना उपचारपछि निको भइसकेका छन् भने विभिन्न अस्पतालका आइसोलेशन तथा होम आइसोलेशनमा ४ हजार ८ सय ५८ जना उपचाररत रहेका छन् । अघिल्लो साता सक्रिय सङ्क्रमतिको सङ्ख्या ६ हजार ४९ जना रहेकोमा यो हप्ता १ हजार १ सय ९१ जना कम भई ४ हजार ८ सय ५८ जनामा झरेको हो । पुस ६ गतेसम्म मृत्यु हुनेको सङ्ख्या भने ८ सय ८९ जना पुगेको छ । यो अघिल्लो साताभन्दा १५ जनाले बढी हो । यो प्रदेशमा कोभिड–१९ बाट मृत्यु हुनेको दर ०.६३ प्रतिशत रहेको छ । अघिल्लो साता ३९.४ प्रतिशत महिला र ६०.६ प्रतिशत पुरुष सङ्क्रमित भएकोमा पुस ६ गते पनि सोही अनुपातमा महिला र पुरुषको सङ्क्रमित प्रतिशत रहेको छ । बागमती प्रदेशमा अघिल्लो हप्ता देशको कूल सङ्क्रमणको सङ्ख्या ५४.७४ प्रतिशत रहेकोमा पुस ६ गते आइपुग्दा केही कम भई ५४.७० प्रतिशत भएको छ ।

गण्डकी प्रदेश
गण्डकी प्रदेशमा मङ्सिर ३० गतेबाट पुस ६ गतेसम्म थप ६ सय ६२ जनामा कोभिड–१९ सङ्क्रमण देखिएको छ । जसमध्ये ३ सय ७७ जना पुरुष र २ सय २९ जना महिला रहेका छन् । योसँगै प्रदेशमा कुल सङ्क्रमितको सङख्या १५ हजार ४ सय ३० रहेको छ । यो साता कोभिड–१९ को सङ्क्रमणबाट ९ सय ६९ जना निको भएका छन् । योसँगै प्रदेशमा निको हुनेको सङ्ख्या १५ हजार ६ सय ६१ रहेको छ । हालसम्म प्रदेशमा कोभिड–१९ को सङ्क्रमणबाट १ सय ७७ जनाको मृत्यु भएको छ जसमध्ये यो साता ४५ जनाको मृत्यु भएको हो । स्वास्थ्य तथा जनसङ्ख्या मन्त्रालयको पुस ६ गतेको तथ्याङ्क अनुसार प्रदेशमा हाल ८ सय ५३ जना सक्रिय सङ्क्रमित रहेका छन् । सक्रिय सङ्क्रमितमध्ये ६ सय ५७ जना होम आइसोलेशनमा छन् भने ८१ जना आइसियू र १० जना भेण्टिलेटरमा रहेका छन् ।

सुदूरपश्चिम प्रदेश
स्वास्थ्य तथा जनसङ्ख्या मन्त्रालयका अनुसार सुदूरपश्चिम प्रदेशमा मङ्सिर ३० गतेदेखि पुस ६ गतेसम्म २ सय ८२ जनामा कोभिड सङ्क्रमण पुष्टि भएसँगै सङ्क्रमित हुनेको सङ्ख्या ८ सय पुगेको छ । पुस ६ गते मात्रै सुदूरपश्चिम प्रदेशमा ४५ जनामा कोभिड सङ्क्रमण पुष्टि भएको छ । जसमध्ये अछाम जिल्लामा २२ जना, कञ्चनपुरमा एक जना, कैलालीमा १० जना, डडेल्धुरामा तीन जना, डोटीमा चार जना, दार्चुलामा एक जना र बझाङमा चार जना सङ्क्रमित थपिएका छन् । यो साता सुदूरपश्चिम प्रदेशमा  चार जना सङ्क्रमितको मृत्यु भएसँगै प्रदेशमा मृत्यु हुनेको सङ्ख्या ५४ जना पुगेको छ । पुस ६ गतेसम्म यो प्रदेशका १२ हजार ९ सय १८ जना सङ्क्रमित निको भएका छन् । हालसम्म सुदूरपश्चिम प्रदेशका  १३ हजार ७ सय ७२ जनामा कोभिड पुष्टि भएको छ ।

अनलाइन डेस्क