समाचारहरू

एक सातामा थपिएका कोभिड–१९ का सङ्क्रमितभन्दा निको भएका सङ्क्रमितको सङ्ख्या १ हजार १ सय ८० बढी रहेको छ । यो एक सातामा १७ हजार ४ सय १० जना सङ्क्रमित थपिएका छन् भने १८ हजार ५ सय ९० सङ्क्रमित निको भएका छन् । गत साता कोभिड–१९ का सङ्क्रमित १६ हजार १ सय जना थपिएका थिए । कात्तिक १८ गते १ लाख ७९ हजार ६ सय १४ जना सङ्क्रमित भएकामा कात्तिक २४ गते कूल सङ्क्रमित १ लाख ९७ हजार २४ जना पुगेको स्वास्थ्य तथा जनसङ्ख्या मन्त्रालयले जनाएको छ । एक साताको अवधिमा १ सय २२ जना कोभिड सङ्क्रमितको मृत्यु भएको छ । अघिल्लो साता १ सय ८ जना कोभिड सङ्क्रमितको मृत्यु भएको थियो । योसँगै मृत्यु हुनेको सङ्ख्या १ हजार १ सय २६ पुगेको छ । एक सातामा ७० हजार २ सय ७६ नमूना परीक्षण गरिएको पनि मन्त्रालयले जनाएको छ । गत साता ६९ हजार १ सय १८ ओटा स्वाब परीक्षण गरिएको थियो । हालसम्म १५ लाख ५१ हजार २ सय ५४ ओटा स्वाबको परीक्षण गरिएको छ ।

प्रदेश १
स्वास्थ्य तथा जनसङ्ख्या मन्त्रालयका अनुसार कात्तिक १८ गतेदेखि कात्तिक २४ गतेसम्मको अवधिमा झापामा २ सय ५९ जना पुरूष र १ सय ६७ जना महिला गरी ४ सय २६ जनामा कोभिड–१९ को सङ्क्रमण पुष्टि भएको छ । सुनसरीमा ४ सय ३२ जना पुरूष र ३ सय जना महिला गरी ७ सय ३२ जना, खोटाङमा १२ जना पुरूष र १८ जना महिला गरी ३० जना, मोरङमा ६ सय ७४ जना पुरूष र ४ सय ४० जना महिला गरी १ हजार १ सय १४ जना, उदयपुरमा ५५ जना पुरूष र २५ जना महिला गरी ८० जना, धनकुटामा १९ जना पुरूष र १५ जना महिला गरी ३४ जना, इलाममा १५ जना पुरूष र ११ जना महिला गरी २६ जना, पाँचथरमा १७ जना पुरूष र आठ जना महिला गरी २५ जना, ओखलढुङ्गामा १९ जना पुरूष र ६ जना महिला गरी २५ जना, भोजपुरमा १५ जना पुरूष र दुई जना महिला गरी १७ जना, सङ्खुवासभामा १० जना पुरूष र पाँच जना महिला गरी १५ जना, ताप्लेजुङमा पाँच जना पुरूष, सोलुखुम्बुमा चार जना पुरूष र दुई जना महिला गरी ६ जना, र तेहृथुममा १६ जना पुरूष र पाँच जना महिला गरी २१ जनामा कोभिड–१९ को सङ्क्रमण पुष्टि भएको छ । प्रदेश १ मा रहेका कोशी कोभिड–१९ अस्पताल, प्रदेश जनस्वास्थ्य प्रयोगशाला, वीपी कोइराला स्वास्थ्य विज्ञान प्रतिष्ठान घोपा प्रयोगशाला, मेची अस्पताल प्रयोगशाला, कोटीहोम प्रयोगशाला, नोवेल अस्पताल प्रयोगशाला, विराट अस्पताल प्रयोगशाला र न्यूरो अस्पताल प्रयोगशालामा गरिएको कोभिड–१९ को परीक्षणमा प्रदेश १ मा एक साताको अवधिमा २ हजार ५ सय ५६ जनामा कोभिड–१९ को सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

प्रदेश २
एक सातामा प्रदेश २ मा कोभिड सङ्क्रमित ४ सय ९० जना थपिएका छन् । अघिल्लो साता ५ सय २९ जना थपिएका थिए । कात्तिक १८ गते १८ हजार ४ सय ७९ सङ्क्रमित रहेकामा कात्तिक २४ गते आइपुग्दा यो सङ्ख्या बढेर १८ हजार ९ सय ६९ पुगेको छ । एक सातामा थप आठ जना सङ्क्रमितको मृत्यु भएको छ । प्रदेश २ मा कात्तिक २४ गतेसम्म १ सय ६७ जनाको मृत्यु भएको छ । एक सातामा ५ सय ६६ जना सङ्क्रमित सङ्क्रमण मुक्त भएका छन् । कात्तिक १८ गते १ हजार ९६ जना सक्रिय सङ्क्रमित भएकामा कात्तिक २४ गतेसम्म आइपुग्दा ८४ घटेर १ हजार १२ मा आएको छ ।

बागमती प्रदेश
यस प्रदेशमा कात्तिक २४ गते कोभिड–१९ सङ्क्रमणको सङ्ख्या महिला ४० हजार ८ सय १५ जना र पुरुष ६५ हजार १ सय ९७ जना गरी जम्मा १ लाख ६ हजार १२ जना पुगेको छ । गत साता ९३ हजार ३ सय ३२ जना कोभिड–१९ सङ्क्रमित रहेकोमा यो साता १२ हजार ६ सय ८० जना सङ्क्रमित थपिएका हुन् । अघिल्लो साताभन्दा यो साता नयाँ सङ्क्रमणको यो सङ्ख्या २ हजारले बढी हो । यस प्रदेशका कूल सङ्क्रमितमध्ये ८२ हजार ५ सय २० जना उपचारपछि निको भइसकेका छन् भने विभिन्न अस्पतालका आइसोलेशन तथा होम आइसोलेशनमा २२ हजार ९ सय ४३ जना उपचाररत रहेका छन् । अघिल्लो साता सक्रिय सङ्क्रमतिको सङ्ख्या २३ हजार १ सय ३२ जना रहेकोमा यो साता १ सय ८९ जना कम भई २२ हजार ९ सय ४३ जनामा झरेको हो । कात्तिक २४ गतेसम्म मृत्यु हुनेको सङ्ख्या भने ५ सय ४९ जना पुगेको छ । यो गत साताहप्ता भन्दा ५८ जनाले बढी हो । यस प्रदेशमा कोभिड–१९ बाट मृत्यु हुनेको दर अघिल्लो साता ०.५३ प्रतिशत रहेकोमा यो साता ०.५२ प्रतिशतमा झरेको छ ।
यस प्रदेशमा महिला सङ्क्रमितको प्रतिशत प्रत्येक साता बढिरहेको छ । अघिल्लो साता ३८ प्रतिशत महिला र ६२ प्रतिशत पुरुष सङ्क्रमित भएकोमा कात्तिक २४ गते आइपुग्दा महिला सङ्क्रमित ०.५ प्रतिशत बढेर ३८.५ प्रतिशत पुगेको छ भने पुरुष सङ्क्रमित ६१.५ प्रतिशत रहेको छ । बागमती प्रदेशमा अघिल्लो साता देशको कूल सङ्क्रमणको सङ्ख्या ५२.८९ प्रतिशत रहेकोमा कात्तिक २४ गते आइपुग्दा बढेर ५३.८१ प्रतिशत पुगेको छ । यस प्रदेशमा २१ देखि ५० वर्ष उमेरका सङ्क्रित दुई तिहाईभन्दा बढी रहेका छन् भने मृत्यु हुनेको प्रतिशत भने ६० वर्ष माथिका उमेरमा बढी रहेको छ । यस प्रदेशमा कोभिड–१९ सङ्क्रमण पुष्टि भएकामध्येमा अघिल्लो साता ७४.७ प्रतिशत निको हुनेको सङ्ख्या रहेकोमा कात्तिक २४ गते आइपुग्दा यो सङ्ख्या बढेर ७७.८ प्रतिशत पुगेको छ ।

गण्डकी प्रदेश
गण्डकी प्रदेशमा कात्तिक १८ गतेबाट कात्तिक २४ गतेसम्म थप १ हजार ६ सय ८३ जनामा कोभिड–१९ सङ्क्रमण देखिएको छ । जसमध्ये १ हजार ६२ जना पुरुष र ६ सय २१ जना महिला रहेका छन् । योसँगै प्रदेशमा कुल सङ्क्रमितको सङख्या ९ हजार ७ सय २८ रहेको छ । यो साता कोभिड–१९ को सङक्रमणबाट १ हजार २ सय ५१ जना निको भएका छन् । योसँगै प्रदेशमा निको हुनेको कूल सङख्या ७ हजार ९ सय ४५ रहेको छ । हालसम्म प्रदेशमा कोभिड–१९ को सङ्क्रमणबाट ६५ जनाको मृत्यु भएको छ । जसमध्ये यो साता ११ जनाको मृत्यु भएको हो । स्वास्थ्य तथा जनसङ्ख्या मन्त्रालयको कात्तिक २४ गतेको तथ्याङ्क अनुसार प्रदेशमा हाल २ हजार ९ सय ७१ जना सक्रिय सङ्क्रमित रहेका छन् जसमध्ये कास्की र नवलपरासी (बर्दघाट सुस्ता पूर्व) जिल्लामा ५ सय भन्दा बढी रहेका छन् । सक्रिय सङ्क्रमितहरूमध्ये १ हजार ७ सय ४८ जना होम आइसोलेशनमा छन् भने ७२ जना आइसियू र नौ जना भेण्टिलेटरमा रहेका छन् ।
म्याग्दीको सदरमुकाम बेनीबजार क्षेत्रमा कोभिड–१९ सङ्क्रमण रोक्नका लागि सचेत गराउन जनप्रतिनिधिहरू नागरिकको घरमा पुग्न थालेका छन् । कात्तिक २३ गतेदेखि नगर प्रमुख तथा वडा अध्यक्षहरूले थालेको घरदैलो कार्यक्रम नगरपालिकाको सबै वडामा सञ्चालन गरिने बेनी नगरपालिकाले जनाएको छ । पहिलो दिन बेनी नगरपालिकाको ७ र ८ नम्बर वडा रहेको सदरमुकाम क्षेत्रमा नगर प्रमुख हरिकुमार श्रेष्ठको नेतृत्वमा घरदैलो गरिएको छ । त्यस्तै कात्तिक १४ गतेदेखि सात दिनका लागि कडा रुपमा गरिएको लकडाउन कात्तिक २२ गते देखि पुनः सात दिन थप गरी २८ गतेसम्म पुर्या‍इएको छ । लकडाउनको अनुगमनसहित कात्तिक २३ गतेदेखि घरदैलोमा पुगेर सर्वसाधारणको अवस्था बुझ्ने, लक्षण देखिएमा निगरानी बढाउनुका साथै जनस्वास्थ्यका मापदण्डको पूर्ण रुपमा पालना गराउन कडाइ गर्नका लागि अभियान थालिएको नगर प्रमुख श्रेष्ठले बताउनुभयो ।
जिल्ला प्रशासन कार्यालय तनहुँले तिहारको अवसरमा देउसी भैलो खेल्न प्रतिबन्ध लगाएको छ । कोभिड– १९ को जोखिम बढ्दै जान थालेपछि जिल्ला सङ्कट व्यवस्थापन केन्द्रको कात्तिक २० गते भएको बैठकको निर्णय अनुसार देउसी भैलो, रमाइलो मेला लगायतका कार्यक्रममा प्रतिबन्ध लगाइएको हो । बैठकले तिहारको अवसरमा देउसी भैलो नखेल्न, सार्वजानिक रुपमा हिँड्डुल तथा भीडभाड नगर्न, मादक पदार्थ सेवन गर्न, होहल्ला गर्न र जुवातास नखेल्न सर्वसाधरणलाई अनुरोध गर्ने निर्णय गरिएको सहायक प्रमुख जिल्ला अधिकारी चित्राङ्द बरालले विज्ञप्तिमार्फत जानकारी दिनु भएको छ ।
कास्की जिल्ला प्रशासन कार्यालयले कात्तिक २४ गते एक विज्ञप्ति जारी गरेर तिहार र छठमा भीडभाड नगर्न र पर्व आफ्नै परिवारमा सीमित रही मनाउन आग्रह गरेको छ । प्रमुख जिल्ला अधिकारी ज्ञाननाथ ढकालले जारी गर्नु भएको विज्ञप्तिमा देउसी भैलो नखेल्न, सार्वजानिक रुपमा हिँड्डुल तथा भीडभाड नगर्न, पटाखा जस्ता विस्फोटक पदार्थ किनबेच गर्न नपाइने भनिएको छ ।

लुम्बिनी प्रदेश
लुम्बिनी प्रदेशमा कात्तिक १८ गतेदेखि कात्तिक २४ गतेसम्म ८ सय ७७ महिला र १ हजार ३ सय ५१ पुरुष गरी जम्मा २ हजार २ सय २८ जनामा कोभिड सङ्क्रमण पुष्टि भएको छ । जसमध्ये तराईका जिल्लाहरूमा सबैभन्दा बढी रुपन्देहीमा २ सय ८७ महिला र ३ सय ७५ पुरुष गरी ६ सय ६२ जना सङ्क्रमित भएका छन् भने नवलपरासी (बर्दघाट सुस्ता पश्चिम)मा सबैभन्दा कम ३० महिला र ७७ पुरुष गरी १ सय ७ जना सङ्क्रमित भएका छन् । यसैगरी पहाडी जिल्लाहरूमा सबैभन्दा बढी पाल्पामा १ सय ५१ महिला र २ सय ६३ पुरुष गरी ४ सय १४ जना सङक्रमित भएका छन् भने सबैभन्दा कम रुकुम (पुर्व)मा तीन महिला र दुई पुरुष गरी पाँच जना रहेका छन् । प्रदेशमा सबैभन्दा बढी सक्रिय सङ्क्रमित हुने जिल्लामा दाङ र रुपन्देही रहेका छन् । होम आइसोलेशनमा रहनेको सङ्ख्या २ हजार २ सय २ रहेको छ । यसैगरी आइसीयूमा ५४ जना र भेण्टिलेटरमा ६ जना रहेका छन् । प्रदेशमा १८ हजार ५ सय ६७ जना निको भएका छन् । हाल ३ हजार ३ सय ५ जना सक्रिय सङ्क्रमित रहेका छन् भने । १ सय ६१ जनाको कोभिडका कारण मृत्यु भएको छ ।

कर्णाली प्रदेश
कर्णाली प्रदेशमा कात्तिक २४ गते २० जनामा कोभिड–१९ सङ्क्रमणको पुष्टि भएसँगै सङ्क्रमित हुनेको सङ्ख्या ५ हजार ८ सय ७३ रहेको छ । जसमध्ये ३ सय ३४ जना सक्रिय सङ्क्रमति छन् । ३ सय ९ जना होम आइसोलेशनमा बसेका र नौ जना आइसीयूमा उपचार गराइरहेका छन् । हालसम्म ५ हजार ५ सय २६ जना निको भइसकेका छन् । कोभिड–१९ को सङ्क्रमणबाट यो साता थप एक जनाको मृत्यु हुँदा मृतकको सङ्ख्या १३ पुगेको छ । यस प्रदेशमा एक साताअघि कोभिड–१९ सङ्क्रमितको सङ्ख्या ५ हजार ६ सय ३५ रहेको थियो । यो साता २ सय ३८ जना सङ्क्रमित थपिएका हुन् ।

सुदूरपश्चिम प्रदेश
एक सातामा सुदूरपश्चिम प्रदेशमा कोभिड सङ्क्रमित ५ सय ४१ जना थपिएका छन् । अघिल्लो साता २ सय ५४ जना थपिएका थिए । कात्तिक १८ गते १० हजार ७४ सङ्क्रमित रहेकामा कात्तिक २४ गते आइपुग्दा यो सङ्ख्या बढेर १० हजार ६ सय १५ पुगेको छ । एक सातामा यो प्रदेशमा मृत्यु हुनेको सङ्ख्या १० थपिएको छ । सुदूरपश्चिम प्रदेशमा कात्तिक २४ गतेसम्म २७ जनाको मृत्यु भएको छ । एक सातामा ५ सय ६६ जना सङ्क्रमित सङ्क्रमण मुक्त भएका छन् । कात्तिक १८ गते ८ सय ९२ जना सक्रिय सङ्क्रमित भएकामा कात्तिक २४ गतेसम्म आइपुग्दा २८ घटेर ८ सय ६४ मा आएको छ ।

अनलाइन डेस्क