समाचारहरू

गुल्मी कारागारमा पुस्तकालय स्थापना भएपछि कैदीबन्दी खुसी भएका छन् । इन्सेकसहितका सङ्घ संस्थाका अनुगमनमा कैदीबन्दीले प्रत्येक पटक पुस्तकालय र टिभीको माग गर्दै आएका थिए ।

कैदीबन्दीको वर्षौँदेखिको माग पुरा गर्न इन्सेकले विभिन्न निकायमा पहल गरिरहेको थियो । २१ औँ निजामती सेवा दिवसको अवसरमा विभिन्न संस्थाहरूको सहयोगमा पुस्तकालय स्थापना गरिएको प्रमुख जिल्ला अधिकारी कृष्णप्रसाद शर्माले बताउनु भयो । शर्माले ध्यानाकर्षणको लागि इन्सेक र सहयोगको लागि सबै संस्थालाई धन्यवाद व्यक्त गर्नुभयो ।

पुस्तकालय स्थापना गरेर पहिलो चरणमा कर्मचारी मिलन केन्द्रले १२ हजार रुपियाँ, नेपाल निजामती कर्मचारी युनियन गुल्मीले १० हजार रुपियाँ र जिल्ला प्रशासन कार्यालय सहितका संस्थाहरूको २० हजार गरेर ४२ हजार रुपियाँका पुस्तक हस्तान्तरण गरिएको प्रमुख जिल्ला अधिकारी शर्माले जानकारी दिनुभयो । कैदी जीवन बिताइरहेका कैदीबन्दीलाई अध्ययनमा सहजीकरण गर्नका लागि कारागारको पुस्तकालयले फाइदा पुग्ने भएकाले पुस्तक सहयोग गर्न शर्माले सबैलाई आग्रह गर्नुभयो । पुस्तकालय स्थापना भएपछि कैदीबन्दीहरूको समय व्यावस्थापनमा सहजीकरण हुनेछ । कारागारमा पढ्ने युवा अवस्थाका धेरै कैदीबन्दीहरू रहेका छन् ।

कैदपछिको जीवन सरल बनाउन अध्ययनले निकै फाइदा पुग्ने कारागारका नाइके हरिबहादुर थापाले बताउनु भयो । ‘साँघुरो ठाउँमा धेरै आवश्यकता पुरा हुँदै गएका छन् । पुस्तकालयको माग वर्षौँदेखि गरेका हौँ । वर्षौँको चाहाना पुरा गर्ने सबैलाई धन्यवाद', थापाले भन्नुभयो । इन्सेककै आग्रहमा नेपाल निजामती कर्मचारी सङ्गठनले स्थापना दिवसको अवसरमा ०८१ वैशाख ६ गते गुल्मी कारागारमा टिभी प्रदान गरेको थियो ।

गुल्मी कारागारमा अहिले कुल १ सय ८ जना कैदीबन्दी रहेका छन् । २५ जनाको क्षमता भएका कारागारमा करिव पाँच गुणा बढी कैदीबन्दी हुँदा व्यवस्थापनमा समस्या छ । तर, पनि सङ्घ संस्थाहरूको पहल र समन्वयमा भएका सहयोगले केही राहत महसुस भएको कारागार प्रमुख रेश्मीराज पन्थीले बताउनु भयो । उहाँले सामग्रीको सहयोग संस्थाहरूबाट भइरहेकाले राज्यको तर्फबाट भौतिक संरचनामा जोड दिनुपर्ने बताउनु भयो । उहाँले पुस्तकालय संरक्षण र अझै व्यवस्थित गर्दै लैजाने बताउनु भयो । जिल्ला प्रहरी कार्यालयको हिरासतमा एक वर्षदेखि पुस्कालय सञ्चालनमा रहेको छ । इन्सेकले प्रहरी हिरासत र कारागारको पुस्तकालयको लागि आफ्ना प्रकाशनहरू प्राची र वर्ष पुस्तकहरू सहयोग गरिरहेको छ ।

टोपलाल अर्याल