केवलकार निर्माण विवाद: २० जना प्रहरीसहित २४ जना घाइते

  ०८१ माघ १३ गते

फुङलिङ नगरपालिका-११ पाथीभरा क्षेत्रमा केवलकार निर्माणको विरोधमा उत्रिएको ‘नो केवलकार समूह’ माथि प्रहरीले माघ १२ गते गोली चलाएको छ ।

केवलकार निर्माणको विरोध गर्दै आएको समूहले प्रहरीलाई आक्रमण गरेपछि प्रहरीले आत्मरक्षाका लागि गोली चलाएको जिल्ला प्रशासन कार्यालयले जनाएको छ ।

नो केवलकार समूहको आक्रमणमा नेपाल प्रहरीका ११ जना र सशस्त्र प्रहरीका नौ जना गरी २० जना घाइते भएका छन् । प्रहरीले चलाएको गोली प्रहारबाट चार जना घाइते भएका छन् ।

नो केवलकार समूहले आक्रमण गरेपछि प्रहरीले आत्मरक्षाका लागि गोली चलाएको प्रमुख जिल्ला अधिकारी नेत्रप्रसाद शर्मा पौडेलले बताउनु भयो । प्रमुख जिल्ला अधिकारीले भन्नुभयो ‘उनीहरूले माथिबाट प्रहरीमाथि आक्रमण भएपछि सुरक्षाकर्मीबाट फायरिङ भएको हो,’ ।

प्रहरीले चलाएको गोली प्रहारबाट विरोधी समूहका तेहृथुम जिल्ला, म्याङलुङ नगरपालिका-९ का ३६ वर्षीय यामबहादुर लिम्बू, मिक्लाजुङ गाउँपालिका-५ का सगुन लावती, फुङलिङ नगरपालिका-८ का २० वर्षीय धर्म पालुङ्गवा र मिक्लाजुङका १७ वर्षीय बालक मंगोल लावती घाइते हुनु भएको छ ।

यामबहादुरको बाँया गोडामा गोली लागेको छ । उहाँको जिल्ला अस्पतालमा प्राथमिक उपचार पश्चात नोबेल अस्पताल, विराटनगर रेफर गरिएको जिल्ला अस्पताल ताप्लेजुङले जनाएको छ । सगुन लावती अगाडीको बाँया छातीबाट गोली लागि पछाडीबाट बाहिरिएको र स्वास्थ्य अवस्था मध्यम रहेको छ । धर्म पालुङ्वाको बाँया कुममा चोट लागि हड्डी भाँचिएको छ । घाइते सगुन र धर्मलाई उपचारका लागि नोवेल रेफर गरिएको छ । मंगोल लावतीको बाँया आँखामा चोट लागेको र जिल्ला अस्पतालमा उपचार भइरहेको छ ।

नो केवलकार समूहसँगको झडपमा नेपाल प्रहरीका ११ जना र  सशस्त्र प्रहरीका नौ जना घाइते भएका छन् ।

केवलकार निर्माण खारेजीको माग गर्दै ०८१ माघ १३ गतेदेखि आन्दोलनका लागि भन्दै पहिचान पक्षधरहरू बलुडाँडामा भेला भएका छन् । यो क्षेत्रलाई पहिचान पक्षधरले सेल्टरको रूपमा प्रयोग गर्दै आएको प्रहरीले जनाएको छ । प्रहरी टोली पहिचान पक्षधरलाई तितरबितर पार्न ०८१ माघ १२ गते दिउँसो सो क्षेत्रमा पुगेको थियो । माघ १२ गते साँझ पुन प्रहरी सेल्टर क्षेत्रमा पुगेपछि आन्दोलनरत पक्षले माथिबाट रोक्न खोजेपछि प्रहरीले गोली चलाएको प्रमुख जिल्ला अधिकारी नेत्रप्रसाद शर्मा पौडेलले बताउनु भयो ।

शान्तिपूर्ण आन्दोलनको तयारी गर्दा राज्यले मान्छे ताकेर गोली प्रहार गरेको किराँत याक्थुङ चुम्लुङकी महासचिव निरन्ती तुम्बापोले आरोप लगाउनु भएको छ ।

photo 20250125 Taplejung


एलिना दियाली