समाचारहरू

नुवाकोटमा निर्माणाधीन केन्द्रीय कारागारको पहिलो युनिट सञ्चालनमा ल्याइएको छ ।

विदुर नगरपालिका–६ चण्डीपोखरी खम्बाक्याम्पमा निर्माण गरिएको कारागारको पहिलो युनिटको गृहमन्त्री रमेश लेखकले ०८१ भदौ १५ गते उद्घाटन गर्दै औद्योगिक कारागारको रूपमा विकास गरी बन्दीहरूलाई आयआर्जनमा सहभागी गराउने बताउनु भयो । ‘कारागारलाई उत्पादनशील बनाएर औद्योगिक रूपमा विकास गर्ने योजनामा छौं । यहाँ जग्गा धेरै रहेकोले आर्थिक गतिविधिलाई प्राथमिकतामा राखेर काम गर्नेछौं’ मन्त्री लेखकले भन्नुभयो ।

मन्त्री लेखकले कैदीबन्दीको पनि अधिकार हुने भएकोले उनीहरूको अधिकारलाई प्रत्याभूत गराउन सुविधासम्पन्न कारागार निर्माण गरिएको बताउनु भयो ।

नेपाल सरकारका महान्यायाधिवक्ता रमेश बडालले मुलुकमा १६ हजार कैदी बन्दी अट्ने क्षमता भएको कारागार रहे पनि हाल २८ हजारभन्दा बढी कैदीबन्दी राखिएकोबाट नै नेपालको कारागारको खराब अवस्था रहेको स्पष्ट हुने बताउनु भयो । महान्यायाधिवक्ता बडालले कैदीबन्दीको कानुनी अधिकारलाई स्थापित गराउन र उनीहरूलाई उद्यममा जोड्नको लागि यो कागागार सफल हुने विश्वास व्यक्त गर्नुभयो ।

पहिलो चरणमा १ हजार ३ सय ७० जना क्षमताको कैदीबन्दी राख्ने पहिलो युनिट निर्माण सम्पन्न भएको हो । ६ सय ४५ रोपनी क्षेत्रफलमा फैलिएको जग्गामा पहिलो युनिट निर्माण गर्न ४५ करोड ४२ लाख रुपियाँ खर्च भएको शहरी विकास तथा भवन निर्माण विभागका महानिर्देशक मचाकाजी महर्जनले जानकारी दिनुभयो ।

पहिलो चरणमा कारागार कार्यालय नुवाकोटका १४ महिलासहित १ सय ६३ जना कैदीबन्दीलाई स्थानान्तरण गरिएको छ भने काठमाडौंबाट १ सय ५० जनालाई स्थानान्तरण गरी ल्याइएको छ । केही साताभित्रै काठमाडौंबाट थप ५ सय कैदीबन्दीलाई स्थानान्तरण गरी ल्याइने कारागार व्यवस्था विभागका महानिर्देशक जयनारायण आचार्यले बताउनु भयो ।

खेलमैदानसहित आधुनिक र सुविधा सम्पन्न कारागारको रूपमा निर्माण सम्पन्न गर्ने योजनाको साथ सुरु गरिएको नुवाकोटको केन्द्रीय कारागारको सबै संरचना निर्माण सम्पन्न भएमा २० प्रतिशत महिलासहित ७ हजार कैदीबन्दीलाई राख्न सकिनेछ ।

नवदीप श्रेष्ठ