समाचारहरू

बागलुङ जिल्लाको सदरमुकाम बागलुङ बजारबाट आधा घण्टाको दुरीमा रहेको भिरलाङखुरीका स्थानीयको दिन र रात पानीको लाइन बसेरै बित्ने गरेको छ ।

जिल्ला सदरमुकामको नजिक भएर पनि यहाँका स्थानीयहरू रात र दिन गरेर दैनिक २२ घण्टा कुवाको पानीमा लाइन बस्न बाध्य छन् ।

बागलुङ नपा–६ मा पर्ने यस स्थानका १ सय ८६ घरधुरीका बासिन्दाहरूले पिउने पानीको समस्या वर्षौँदेखि खेप्दै आएका छन् ।

‘प्रत्येक घरका एकजना सदस्य पानीको लाइन बस्नकै लागि खटिनु पर्ने यहाँको बाध्यता छ ।’–स्थानीय रूद्र केसीले भने–‘कुवा र मुलको पानी एक घण्टामा २० लिटरमात्र भर्न सकिन्छ ।’ केसीका अनुसार नगरपालिका भित्रका बासिन्दा भएर पनि घण्टौँ लाइन बसेर कुवाको पानी पिउनु पर्ने बाध्यतामा परेका नगरबासी बिहान २ बजेदेखि रातको १२ बजेसम्म पानीकै लाइनमा बस्ने गरेको केसीले बताए ।

‘हामीलाई खानेपानीको ठुलो समस्या छ । गाउँमा आउने सबैलाई समस्या सुनाएका छौँ । समाधान गर्छाैँ पनि भन्छन् । तर, अझैसम्म समाधान भएको छैन ।’–स्थानीय रञ्जिता सुवेदीले भनिन् । पानीको लाइन बस्दा अरू काम समयमा गर्न नसकेको उनको गुनासो छ । ‘खानेपानी लिन धाउँदा छोराछोरी समयमा स्कुल पठाउन सकिँदैन । समयमा खान बनाउन र मेलापात जान भ्याइँदैन ।’–सुवेदीले भनिन् ।

बाग्लुङ नपा–६ का वडाध्यक्ष खेमराज सापकोटाले गाउँका जनतालाई पानीको निकै समस्या भएकाले समाधानको प्रयास भइरहेको बताए । ‘पानीको समस्याबारे हामी गम्भीर छौँ । जनप्रतिनिधिका रूपमा हामी आइसकेपछि एक घर एक धारा अभियान सञ्चालन गरेर काम गरिरहेका छौँ ।’–उनले भने–‘यो समस्या तत्कालै नहटे पनि समस्या घटाउने गरी काम जारी छ ।’

अहिले स्थानीय जनसहभागितामा धारा जडान गरेर पाइप बिच्छ्याउने काम भइरहेको उनले बताए । कुवाको पानीले समस्या भएपछि गाउँ नजिकैको मौरीभीरको पानीसमेत ल्याइएको छ । जनसङ्ख्याको धेरै भएकोले पनि समस्या समाधान नभएको अध्यक्ष सापकोटाले प्रतिक्रिया दिए ।

सिर्जना पन्त