कुपोषणबाट एक बालिकाको मृत्यू

कुपोषणका कारण चौखाम-९ का मुना धामीकी पाँच वर्षीया छोरी विना धामीको मृत्यू भएको छ । । पाँच किलोमात्रै तौल भएकी विनाको समयमै उपचार नहुँदा माघ २४ गते मृत्यु भएको पीडितका आफन्त जनकसिंह धामीले बताए ।

जन्मँदै सुकेनासले सताइएकी बिनालाई उपचारका लागि गत महिना उपक्षेत्रीय अस्पताल डडेल्धुरा लगिएको थियो । डडेल्धुराले धनगढी 'रिफर' गरेपनि आर्थिक अभावले लैजान नसक्दा विनाको घरमै मृत्यु भएको हो ।

"मैले आफ्नै खर्चमा आमाछोरीलार्इ डडेल्धुरा लगेको थिएँ । धनगढी लगेर उपचार गराउने खर्च जुटाउन नसक्दा बच्चीको मृत्यु भयो ।"-जनकसिंह धामीले भने ।

चिकित्सकले धनगढीमा रहेको पोषण पुनःस्थापना गृहमा उपचारका लागि जान सल्लाह दिएपनि खर्च नहुँदा जान नसकेको उनको भनाइ छ ।

४० वर्षीया मुनाले कान्छी छोरीमा जन्मँदै कुपोषण भएको कुरा धेरै पछि थाहा पाएको बताइन् । कुपोषण भएको थाहा पाएपछि पनि समयमै उपचार हुन नसक्दा ज्यान गुमाउनु परेको उनको भनाइ छ ।

पोषणयुक्त खानेकुरा समयमा नखुवाएकै कारण बच्चामा कुपोषण भएको कुरा तीन महिनाअघि मात्रै स्वास्थ्य चौकीबाट थाहा पाएको मुनाले बताइन् । मुनाका पति क्षयरोगका बिरामी छन् र पनि उनी मजदुरीका लागि भारतको दिल्लीमा छन् ।

घरको आर्थिक अवस्था कमजोर भएपछि उपचार गराउन नसक्दा छोरीको ज्यान गएको मुनाले बताइन् । बैतडी जिल्लामा १३ प्रतिशत बच्चामा कुपोषण रहेको जिल्ला स्वास्थ्य कार्यालयको तथ्याङ्कले देखाएको छ ।

अहिले जिल्ला स्वास्थ्य कार्यालय बैतडीले कुपोषित बालबालिकाहरूको निशुल्क उपचार गर्ने व्यवस्था गरेको जिल्ला स्वास्थ्य कार्यालय बैतडीका सम्पर्क व्यक्ति (हेल्थ असिस्टेन्ट) सन्तोष पाण्डेयले बताए ।


नरी बडु