कुपोषणका कारण बालिकाको मृत्यु भएको घटनाका सम्बन्धमा प्रधानमन्त्रीको चासो

  ०७३ मङ्सिर १ गते

कुपोषणबाट मृत्यु भएकी सिप्खाना गाविस-४ की १४ महिने सुशीला योगीको मृत्यु भएको घटनाका सम्बन्धमा प्रधानमन्त्री पुष्पकमल दाहालले कात्तिक ३० गते स्वास्थ्यमन्त्रीसमक्ष चासो राखेका छन् ।

पीडित बालिकाको कात्तिक २६ गते कुपोषणबाट मृत्यु भएको उनका घरपरिवारले बताएको समाचार सञ्चारमाध्यामहरूमा आएपछि प्रधानमन्त्रीले चासो राखेका हुन् । आवश्यक मात्रामा पौष्टिक आहार नपाएपछि कुपोषण भएकी बालिकाको स्थानीय स्वास्थ्य चौकीमा उपचार हुन नसक्दा जिल्ला अस्पताल लैजाँदै गर्दा बाटोमा मृत्यु भएको मृतक बालिकाका आफन्त नौलाराज योगीले बताए ।

कुपोषणबाट पीडित बालिकालाई स्थानीय स्वास्थ्य चौकीमा उपचार हुन नसकेपछि जिल्ला अस्पताल कालिकोटमा रिफर गरिएको स्वास्थ्य चौकी सिप्खानाका इञ्चार्ज सि.अहेव जनकराज न्यौपानेले बताए ।

कर्णालीका बालबालिकाका लागि पोषण भत्ता तथा खाजा कार्यक्रम सञ्चालन भएपनि प्रभावकारी हुन नसक्दा बालबालिकाहरू कुपोषणको समस्याबाट पीडित हुने गरेका छन् । जिल्ला अस्पताल कालिकोटका प्रमुख कौशल अलीले कुपोषणबाट बालिकाको जिल्ला अस्पताल नपुग्दै बाटोमा मृत्यु भएपछि प्रधानमन्त्री पुष्पकमल दाहालले स्वास्थ्य मन्त्रालयमा कात्तिक ३० गते पत्र पठाएर चासो राखेको बताए ।


कालीबहादुर मल्ल