समाचारहरू

विदेह नगरपालिकाका प्रमुख प्रशासकीय अधिकृत ३५ वर्षीय दिपेन्द्र कुमार शाहलाई ०८१ माघ २७ गते सोही पालिकाका नगर प्रमुख ४० वर्षीय बेचन दास र निजका २५ वर्षीय छोरा राम भजन दासले गालिगलौज र कुटपिट गरेको आरोपमा पीडितले माघ २९ गते जिल्ला प्रशासन कार्यालय धनुषामा उजुरी दिनुभएको छ ।

शिक्षक सेवा आयोगबाट सामाजिक विषयको निम्न माध्यमिक तहमा सिफारिस भई आएकी शिक्षिका पवन कुमारीलाई माघ २७ गते हाजिर गराउँदा नगर प्रमुखका छोरा दासले कार्यकक्षमै गालिगलौज र कुटपिट गरेको र नगर प्रमुख दासले धाक धम्की दिएको भन्दै अधिकृत शाहले सोही दिन जिल्ला प्रहरी कार्यालयमा उजुरी दिनुभएको थियो ।

घटना लगत्तै आरोपितहरूविरुद्ध जिल्ला प्रहरी कार्यालयमा उजुरी दिए तापनि हालसम्म कारबाही प्रकृया अगाडि नबढाउँदा जिल्ला प्रशासनम कार्यालय धनुषामा शान्ति सुरक्षाका लागि उजुरी दर्ता गराएको पीडितले बताउनु भयो ।

यस विषयमा नगरप्रमुख दासलाई जानकारी गराएको र उहाँ कार्य व्यस्तता कारण हालसम्म उपस्थित नभएको जिल्ला प्रहरी कार्यालय धनुषा मुद्दा शाखाका इन्स्पेक्टर सागर कार्कीले जानकारी दिनुभयो ।

सन्तोषकुमार यादव