समाचारहरू

रामग्राम नपा-१० की २३ वर्षीया माया सहानीलाई कुटपिट गरेको आरोपमा २६ वर्षीय पति अयोध्या केवटविरूद्ध पीडितले जिल्ला प्रहरी कार्यालय नवलपरासीमा कात्तिक २३ गते उजुरी दिएकी छन् ।

घरायसी विवादका क्रममा पतिले कात्तिक २१ गते कुटपिट गर्दा कुमको हड्डी भाँचिएर गम्भीर घाइते बनाएपछि पीडितको उपचार बुटवलस्थित सिटी अस्पतालमा भएको थियो ।

हाल माइतीघरमा बसिरहेकी पीडितको उपचार हुने क्रममा सासू शेरसी केवटले सानो छोरालाईसमेत खोसेर जबरजस्ती लगेको भन्दै बच्चा फर्काउनको लागि समेत पीडितले उजुरी दिएकी छन् । आरोपित केवट भने घटना भएकै दिनदेखि फरार रहेको प्रहरीले जनायो ।

पीडितले दिएको उजुरीका आधारमा प्रहरीले अनुसन्धान गरिरहेको र फरार आरोपितलाई गिरफ्तार गरी कानुनी प्रक्रिया अगाडि बढाइने जिल्ला प्रहरी कार्यालय, नवलपरासीका सई टिकाराम पोखरेलले जानकारी दिए ।

नारायण पराजुली