समाचारहरू

चार वर्षीया बालिकालाई कुटपिट गरी यातना दिएको आरोपमा महोत्तरीको एकडाँडा गाउँपालिका–३ घर भई हेटौँडा उपमहानगरपालिका-५, सिँचाइटोल बस्ने बुबा २७ वर्षीय रामजी मण्डललाई प्रहरीले ०८० पुस २१ गते गिरफ्तार गरेको छ ।

पीडित बालिकालाई आरोपितले शरीरको विभिन्न भागमा कुटपिट गरी आँखामा खुर्सानीको धुलो हाल्ने गरेको भन्दै पीडित पक्षले पुस २१ गते जिल्ला प्रहरी कार्यालयमा उजुरी दिएको थियो ।

मण्डलले पत्नीलाई पनि नियमित कुटपिट गरी यातना दिने गरेको जिल्ला प्रहरी कार्यालयका डिएसपी लक्ष्मी भण्डारीले इन्सेकलाई जानकारी दिनुभयो ।

बालिकासहित पत्नीलाई पनि नियमित यातना दिने गरेको भन्ने छिमेकीबाट सूचना पाएपछि प्रहरी र सिविन लगाएत अन्य संस्थाका प्रतिनिधिहरूले मण्डलको डेरामा अनुगमन गर्दा बुबाको यातनाबाट गम्भीर अवस्थामा रहेको बालिकालाई उद्धार गरेको सिवन बाल हेल्प लाईन मकवानपुरका प्रबन्धक झविन्द्र ज्ञावलीले बताउनु भयो ।

पीडित बालिकाको स्वास्थ्य उपचार पुस २१ गते हेटौँडा अस्पतालमा भयो । बालिकाको स्वास्थ्य उपचारपछि उद्धार गरी आफूहरूले सुरक्षित आवास गृहमा राखिएको प्रबन्धक ज्ञावलीले जानकारी दिनुभयो ।

पुष्पराज अधिकारी