समाचारहरू

हरिवन नपा–१ माइती घरमा बस्ने २४ वर्षीया गर्भवती रागनी यादवलाई साउन ९ गते सोही ठाउँका ५० वर्षीय नथुनी राय यादव, नथुनीकी ४५ वर्षीया पत्नी राजकली यादव, २६ वषीय छोरा मुकेश यादव, २२ वर्षीय मिथलेश यादव र छोरी बिदिया यादवले कुटपिट गर्दा २ महिना २० दिनको गर्भपतन भएको भन्दै पीडितले साउन २८ गते इलाका प्रहरी कार्यालयमा उजुरी दिनु भएको छ ।

खेतमा बालीनालीसम्बन्धी विवादमा आरोपितहरूले कुटपिटका कारण उपचार गराउनु भएकी पीडितका अनुसार उपचारकै क्रममा साउन १० गते राति आरोपितहरूले कुटपिट गरेको चोटपटकका कारण गर्भपतन भएको हो ।

जया हेल्थ क्लिनिक नवलपुरमा भर्ना भएकोमा चिकित्सकको सल्लाह अनुसार साउन ११ गते जिल्ला अस्पताल मलङ्गवामा थप उपचार गराइएको पीडित रागनीले बताउनु भयो ।

आर्थिक प्रलोभनमा परेर आरोपितलाई प्रहरीले समेत संरक्षण गर्दै आएको पीडित रागनीका भाइ अनोज यादवको आरोप छ ।

घटना साउन ९ गतेको भएपनि आरोपितहरूलाई प्रहरीले गिरफ्तार नगरी मिलापत्रको लागि दबाब दिँदै आएको पीडितका भाइ अरोजकुमार यादवको आरोप छ ।

दबाबमा परेर दुई पटक पञ्चायतमा बसेको तर आरोपितहरूको आक्रमक रवैया र गल्ती महसुस नगर्ने प्रवृत्तिका कारण मिलापत्र गर्न नसकिएको यादवले बताउनु भयो ।

पीडित महिलाले दिएको उजुरी साउन २८ गते दर्ता गरिएको र घटनाको थप अनुसन्धान गरिरहेको इलाका प्रहरी कार्यालय हरिवनका इन्स्पेक्टर अवधेश यादवले बताउनु भयो ।

बुधन साह