समाचारहरू

सलेना गाविसमा मङ्सिर १५ गतेका लागि तय भएको बालविवाह किशोरी वृत्तका सदस्यहरूले रोकेका छन् ।

सलेनामा रहेको किशोरी वृत्त (समूह)ले मङ्सिर १३ गते बालविवाहको सूचना पाएपछि सोहि दिने जिल्ला प्रहरी कार्यालय, जिल्ला प्रशासन कार्यालय र जिल्ला बाल क्लब सञ्जाललाई बालविवाह रोकिदिन अनुरोध गरेको वृत्तकी सचिव कुन्ती भट्टले जानकारी दिइन् ।

१४ वर्षीया बालिका र १६ वर्षीय बालकको विवाह हुनलागेको खबर पाएपछि प्रहरी र किशोरी वृत्तका सदस्यहरूले मङ्सिर १४ गते बालिकाका परिवारलाई सम्झाई-बुझाई गरेपछि विवाह रोकिएको भट्टले बताइन् ।

गाविसमा बसेको सर्वपक्षीय भेलाले गाविसमा हुने बालविवाहलाई रोक्ने प्रतिवद्धता जनाएसँगै बालविवाह रोकिने क्रम बढेको पनि भट्टले बताएकी छन् ।

'मङ्सिर १५ गतेका लागि सलेनाको लिखोडामा बालविवाहको तयारी भएकोले सर्वपक्षीय भेलाले त्यो विवाहलाई रोक्ने निर्णय गरेको हो ।'-उनले भनिन् ।

बालिकाको आग्रहमा आफूहरूले सरोकारवालाहरूलाई खबर गरेपछि विवाह रोकिन सम्भव भएको वृतका किशोरीहरूको भनाइ छ ।

सानै उमेरमा विवाह गर्नु कानुनी अपराध भएकाले किशोरी वृत्तको सहजीकरणमा कसैले अटेर गरी जबरजस्ती बालविवाह गराउन खोज्छ भने कानुन अनुसार कारबाही गरिछाड्ने जिल्ला प्रहरी कार्यालयका प्रमुख बालनरसिंह राणाको भनाइ छ । बैतडीमा ५८ प्रतिशत विवाह सानै उमेरमा हुने गर्दछन् ।

नरी बडु