समाचारहरू

जिल्ला प्रहरी कार्यालयको हिरासत कक्षको कार्यस्थलमा रहेका ३० वर्षीय प्रहरी जवान सुरेन्द्र सिंहको आँखामा मङ्सिर २७ गते जिल्ला प्रहरी कार्यालयको हिरासतमा रहेका ४५ वर्षीय थुनुवा रङ्गमल भनिने गङ्गे महताराले खुर्सानीको धुलो हाली भाग्न खोजेको प्रहरीले जनाएको छ ।

बिहान हिरासतको पहरमामा रहेका प्रहरी सिंहलाई पुर्पक्षका लागि थुनामा रहेका महताराले आँखामा खुर्सानीको धुलो हाली भाग्न खोजेको जिल्ला प्रहरी कार्यालयका डिएसपी रविन श्रेष्ठले बताए ।

चाउचाउ भित्र रहेको खुर्सानीको थुलो सुरक्षाकर्मीको आँखामा हाली भाग्न खोज्ने कैदीलाई जिल्ला प्रहरी कार्यालयको मुल ढोका भन्दा केही परबाट पुनः नियन्त्रणमा लिएको डिएसपी श्रेष्ठको भनाई छ ।

निज महतारालाई हात हतियार खर–खजाना र कर्तव्य ज्यान मुद्दाको अभियोगमा हुम्ला जिल्ला अदालतको आदेशले पुर्पक्षका लागि थुनामा राख्ने आदेश दिएको थियो ।

प्रहरीका अनुसार थुनुवा महतारा मङ्सिर २७ गते बिहान करिब चार बजे शौचालयमा शौच गर्न गएको र शौचबाट हिरासतको ढोका खोली भित्र लैजाने क्रममा सुरक्षार्थ खटिएका सुरक्षाकर्मी प्रहरी जवान सिंहको आँखामा खुर्सानीको धुलो हाली भाग्न खोजेका थिए ।

आँखामा खुर्सानी हालिएका प्रहरीलाई जिल्ला अस्पताल हुम्लामा उपचारका लागि भर्ना गरिएको छ । प्रहरी जवान सिंहको आँखामा जटिल समस्या देखिएकोले चाँडै निको हुन नसक्ने उपचारमा संलग्न डाक्टर टसी लामाले बताए ।

हुम्ला जिल्लामा कारागार नभएको हुँदा अदालतको आदेश अनुसार प्रहरीले कैदीबन्दीलाई हिरासतमा राख्ने गरेको छ । हाल जिल्ला प्रहरी कार्यालयको हिरासत कक्षमा आठ जना थुनुवा रहेका छन् ।

नन्द सिंह