समाचारहरू

धरान उपमहानगरपालिकाका मेयर हर्कराज राईले वडाध्यक्षलाई दिएको कार्यवहाकको जिम्मेवारी कार्यान्वयन नगर्न उच्च अदालत, विरानगरले आदेश दिएको छ ।

उच्च अदालत, विराटनगरका न्यायाधीश न्यायाधीश ध्रुवराज नन्दको ०८१ कात्तिक ४ गतेको आदेशले मेयर हर्कराज राईले दिएको कार्यवहाकको जिम्मेवार कार्यान्वयन नगर्न आदेश दिएको हो ।

उपमेयर भएकै अवस्थामा हर्कराज राईले नातेदार धरान उपमहानगरपालिका-११ का वडाध्यक्ष लोकेन्द्र फागोलाई कार्यवहाक मेयरको जिम्मेवारी दिएपछि उपमेयर आइन्द्र विक्रम बेघाले ०८१ असोज २३ गते उच्च अदालत, विराटनगरमा रिट दर्ता गराउनु भएको थियो । सो रिटमा कात्तिक ४ गते कारबाही गर्दै न्यायाधीश ध्रुवराज नन्दको इजलासले कात्तिक ६ गते छलफलका लागि आउन भनेको छ ।

अदालतको आदेशमा भनिएको छ, ‘स्थानीय सरकार सञ्चालन ऐन, २०७४ को दफा १६ को कार्य विभाजन सम्बन्धी व्यवस्था अन्तर्गतको उपदफा ४ को ‘क’ को १२ ले गरेको व्यवस्था र धरान नगरकार्यपालिका कार्य विभाजन नियमावली, २०७४ को अनुसूची ४ मा काम, कर्तव्य र अधिकार सम्बन्धमा भएको व्यवस्था एवम् सुविधा सन्तुलनको दृष्टिकोणबाट समेत उल्लेखित अन्तरिम आदेश सम्बन्धी छलफल पेसीका दिन सम्मको लागि धरान उपमहानगरपालिका नगर कार्यपालिकाको कार्यालयबाट लेखिएको च नं २३२८ मिति ०८१ असोज २३ को पत्र कार्यान्वयन नगरी यथास्थितिमा राख्नु भनी विपक्षीहरूका नाममा उच्च अदालत नियमावली, २०७३ को नियम ४२ बमोजिम अल्पकालीन अन्तरिम आदेश छ ।’

धरान उपमहानगरपालिकाका मेयर हर्कराज राईले उपमेयर कार्यकक्षमा हुँदाहुँदै नाताले मामा ससुरा पर्ने धरान उपमहानगरपालिका-११ का वडाध्यक्ष लोकेन्द्र फागोलाई असोज २३ गते कार्यवहाक मेयरको जिम्मेवारी दिएर असोज २८ गते बेलायत जानु भएको थियो ।

विनोद सुवेदी