समाचारहरू

आदर्श गाउँपालिकाको कारिया गाउँमा बिरामी बोक्ने स्टेचर नहुँदा स्थानीयले सास्ती खेप्नु परेको छ ।

गाउँकार्यपालिका कार्यालय समेत रहेको कारियाँ गाउँमा स्टेचरको व्यवस्था नहुँदा बिरामीको उपचारका लागि पिठ्यूँमा नाम्लोले बोकेर स्वास्थ्य चौकी पुगाउनु पर्ने बाध्यता रहेको आदर्श गाउँपालिका–२ का स्थानीय स्थानीय घिमिलाल ओझाले दुखेसो पोख्नु भयो ।

उहाँले भन्नु भयो– ‘आदर्श गाउँपालिका वडा नम्बर २ मा पर्ने कारिया गाँउदेखि स्वास्थ्य चौकीसम्म पुग्न झण्डै आधा घण्टा पैदल हिड्नु पर्छ । गाउँमा एउटा स्टेचरको समेत व्यवस्था गरिएको छैन् । गाउँमा कोही बिरामी भएको अवस्थामा नाम्लो लगाएर बिरामीलाई स्वास्थ्य संस्थासम्म लैजाने गरेका छौँ ।’

आदर्श गाउँपालिकाका स्वास्थ्य शाखा प्रमुख बमबहादुर खड्काले गाउँमा स्टेचर नभएको भन्ने सम्बन्धमा आफूलाई जानकारी नभएको र समस्या भए स्टेचरको व्यवस्था गर्न पहल गरिने बताउनु भयो ।

आदर्श गाउँपालिका वडा नम्बर २ का अध्यक्ष रमेश साउदले कारिया गाउँमा स्टेचर नभएको भन्ने जानकारी प्राप्त भएपछि बजेट अभावका कारण आगामि आर्थिक वर्षमा भुक्तानी गर्ने गरे स्टेर खरिद गरिएकोले अबका दिनमा स्थानीयहरुले समस्या भोग्नु नपर्ने बताउनु भयो । कारिया गाउँमा ४ हजार ३ सय ८४ जनाको बसोबास रहेको उहाँले बताउनु भयो ।

प्रेमबहादुर भण्डारी