समाचारहरू

जिल्ला कारागार,डोटीको व्यवस्थापन हुन नसक्दा आफूहरुले समस्या भोग्नु परेको कैदीबन्दीहरुले गुनासो गर्नुभएको छ ।

२५ जनाको क्षमता भएको जिल्ला कारागार, डोटीमा एक जना महिला सहित ५५ जना कैदीबन्दीलाई राखिएको र कारागार जिर्ण अवस्थामा रहेकाले सुरक्षाका दृष्टिकोणबाट पनि जोखिम रहेको ६० वर्षिय कैदी खडक कामीले गुनासो गर्नु भयो ।

उहाँले भन्नु भयो– ‘भवनको छानोमा राणाकालमा लगाइएका स्लेट खिइएर झर्न थालेका छन् । सामान्य हाँवाहुरी चल्दा समेत सिलेट खस्ने डरले दिउसोको समयमा ज्यान बचाउनका लागि चौरमा बस्ने गरेका छौँ । रातिको समयमा बाध्य भएर ज्यान जोखिममा राखेर कोठा भित्र बस्नु पर्ने बाध्यता छ । कैदीबन्दीहरुका लागि कुनै प्रकारको तालिमको समेत व्यवस्था गरिएको छैन् ।’

कैदीबन्दीहरुलाई शुद्ध पिउने पानीको समेत समस्या हुनेगरेको र वर्षाको समयमा धमिलो पानी पिउनु पर्ने बाध्यता रहेको कैदी कमला सार्कीले दुखेसो पोख्नु भयो ।

क्षमता भन्दा दोब्बर कैदीबन्दी राखिएकोले रातिको समयमा सुत्न र  शौचालय प्रयोग गर्नका लागि पालोकुर्नु पर्ने बाध्यता रहेको कैदी सार्कीको भनाइ छ ।

क्षमता भन्दा दोब्बर कैदीबन्दी राख्नु परेकोले कैदीबन्दीलाई सुन्त, शौचालय प्रयोग गर्न र स्वास्थ्य चेकजाँचमा पनि सहजता नभएको जिल्ला कारागार, डोटीका सूचना अधिकारी प्रदिप ओझाले बताउनु भयो ।

गतवर्ष कारागार मर्मतका लागि शहरी सघन कार्यालयले ३ लाख रुपियाँ कारागार मर्मतसम्भारका लागि बजेट विनियोजन गरेको भए पनि उक्त रकम अपुग भएकोले कारागार मर्मत गर्न नसकिएको सूचना अधिकारी ओझाले बताउनु भयो ।

प्रेमबहादुर भण्डारी