समाचारहरू

जिल्लामा कारागार भवन नहुँदा हुम्लाका कैदीबन्दी जिल्ला प्रहरी कार्यालयको हिरासत कक्षमा कोचाकोच गरि बस्न बाध्य भएका छन् । कारागार भवन नभएको कारण ०७९ वैशाखदेखि जिल्ला प्रहरी कार्यालयको हिरासत कक्षमा विभिन्न घटनाका आरोपित कैदीबन्दी बस्ने गरेका छन् ।

कैदीबन्दीहरू प्रहरीको हिरासतमा कोचाकोच गरेर बस्न बाध्य भएको पूर्पक्षमा रहेका थुनुवा जयराज शाहीले गुनासो गर्नु भएको छ । थुनुवा शाहीका अनुसार जिल्लामा कारागार भवन नहुँदा अहिले २२ जना कैदीबन्दी प्रहरीको हिरासत कक्षमा रहेका छन् । हिरासत कक्षमा २२ जना बस्दा सहज रुपमा बस्न र सुत्नका लागि समस्या भएको शाहीले गुनासो गर्नु भएको छ । उहाँले भन्नु भयो “पुरुषका लागि एउटा सानो कोठा रहेको र त्यसमा मिलेर बस्नु पर्दा स्वास्थ्यमा निकै समस्या हुने गरेको छ ।”

हाल जिल्ला प्रहरी कार्यालय, हुम्लाको प्रहरी हिरासतमा २२ जना मध्ये एक जना महिला र अन्य २१ जना पुरुषहरू पूर्पक्षमा रहेका छन् । प्रहरीको हिरासतमा राखिएका थुनुवालाई कारागारले समयमा हेरचाह नगरेको बन्दीहरुले गुनासो गरेका छन् ।

अर्को कोठामा बस्दै आएका घटनाका आरोपित अजय शाहीले घटनामा आरोपित भएर सुधारका लागि कारागार वा जेलमा बस्नुपर्ने कैदीबन्दीले उल्टै समस्या भोग्नुु परिरहेको बताउनु भएको छ । कोचाकोच भएर एउटा कोठामा बस्नुपर्दा डिप्रेशनको समस्या समेत हुने गरेको छ ।

कारागारको भवन निर्माणका लागि ०७९ साउनमा १ करोड रुपियाँ बजेट कारागार व्यवस्थापन विभागले छुट्याएको भएपनि त्यो रकम अपुग हुने भएको जिल्ला कारागार हुम्लाका निमित्त जेलर डवल रावतले बताउनु भयो । उहाँले मुद्दाको छिनोफानो समयमै नभएकाले कोचाकोच गरेर बस्नुपर्ने बाध्यता रहेको बताउनु भएको छ ।

प्रहरी कार्यालयसँगैको हिरासतको लागि व्यवस्था गरिएका तीनै कोठामा कैदीबन्दी राख्नुुपर्ने बाध्यता रहेको जिल्ला प्रहरी कार्यालय हुम्लाका इन्स्पेक्टर गिताराम चौधरीले बताउनु भएको छ ।

नन्द सिंह