समाचारहरू

जिल्ला कारागार गोरखामा दरवन्दी अनुसार स्वास्थ्यकर्मी नहुदा कैदीबन्दी समस्यामा परेका छन् ।

गोरखा कारागारमा एक जना अहेवको दरबन्दी रहे पनि झण्डै दुई वर्ष यता दरबन्दी अनुसारको स्वास्थ्यकर्मी छैनन् । कारागारमा कार्यरत निमित्त अहेव मोतीलाल विश्वकर्माको ०७८ साउनमा काठमाण्डौँ सरुवा भएयता नयाँ अहेव आएका छैनन् ।

कारागारमा स्वास्थ्यकर्मी नहुँदा सामान्य स्वास्थ्य समस्याका लागि पनि कैदीबन्दीलाई गोरखा अस्पताल लैजानुपर्ने बाध्यता रहेको चौकिदार रमेश वयलकोटीले बताउनुभयो । ‘कारागारमै स्वास्थ्यकर्मी हुदा सामान्य स्वास्थ्य समस्या आएपनि देखाउथ्यौ, निकै सजिलो थियो,’–उहाँले भन्नुभयो,‘अहिले केहि भयो कि गोरखा अस्पताल लैजानुपर्छ ।’ प्रेसर, घुडाको समस्याका दिर्घरोगी पनि कारागारमा छन् ।

कारागारको पुरुष कक्षमा ८९ र महिला कक्षमा नौ जना कैदीबन्दी रहेकोमा ६० वर्ष नाघेका कैदीबन्दी सात जना रहेको वयलकाेटीले बताउनुभयो ।

‘स्वास्थ्यकर्मी भइदिए सजिलो हुन्थ्यो, ज्येष्ठ नागरिक पनि हुनुहुन्छ, उहाँहरुलाई हिडाएर अस्पताल सम्म लैजानुपर्थेन, यहि देखाउन पाउथ्यौ’ उहाले भन्नुभयो,‘कहिले काहि त दिनमै तिन ÷ चार जना सम्म विरामी पर्नुहुन्छ, उहाहरुलाई पटक÷पटक लिएर अस्पताल जानुपर्छ ।’

गोरखा अस्पतालका जेलर गणेश भट्टराई पनि स्वास्थ्यकर्मी नहुँदा समस्या परेको बताउनुहुन्छ । ‘दरबन्दीको स्वास्थ्यकर्मी पठाउनका लागि पटक÷पटक अनुरोध गरेका छौँ,’ उहाँले भन्नुभयो,‘अहिले लोकसेवाबाट माग भएको छ, छनौट भएपछि प्रदेशले पठाउने कुरो भएको छ ।’ स्वास्थ्यकर्मी नहुँदा सामान्य स्वास्थ्य समस्याका लागि अस्पताल लैजानुपर्ने बाध्यता रहेको उहाँले बताउनुभयो । ‘दरबन्दी अनुसारको स्वास्थ्यकर्मी भएको भए दुख हुन्थेन, उपचार पनि सहज हुन्थ्थ्यो, डेड दुइ वर्ष भयो समस्या थपिएको छ,’ उहाले बताउनुभयो ।

हरिराम उप्रेती