समाचारहरू

जिल्ला कारागार नुवाकोटमा स्वास्थ्यकर्मी नहुँदा कैदी बन्दीहरू समस्यामा परेका छन् ।

कारागारमा छैठौँ तहको अहेबको दरबन्दी रहे पनि उक्त दरबन्दी ६ महिनादेखि रिक्त रहेको कारागार प्रमुख गंगालाल योगीले जानकारी दिनुभयो ।

स्वास्थ्यकर्मी नभएको कारण सामान्य बिरामी भएका कैदी बन्दीलाई पनि जिल्ला अस्पताल लैजानु पर्छ ।  कारगारमै अहेब हुँदा सामान्य बिरामीको कारागारमै उपचार हुने गरेको योगीले भन्नुभयो ।

सामान्य बिरामी हुँदा पनि स्वास्थ्यकर्मीको अभावमा कैदीबन्दीहरूलाई औषधि चलाउन समस्या हुने गरेको प्रमुख योगीले बताउनुभयो ।

बिरामीको प्रकृति अनुसार कुन औषधि कति मात्रा खाने तथा बिरामीलाई आवश्यक स्वास्थ्य परामर्श दिनु पर्ने कार्य स्वास्थ्यकर्मीले नै दिनु पर्दछ । तर, कर्मचारी नहुँदा समस्या भएको योगीले भन्नुभयो ।

जिल्ला कागारमा हाल नौ जना मानसिक रोगका बिरामी रहेका छन् । नौ जना नियमित औषधि सेवन गर्नु पर्ने र १५ जना दीर्घरोगीहरू रहेका छन् ।

कारागारमा १७ जना महिलासहित १ सय ६९ जना कैदीबन्दी रहेका छन् । ६० वर्ष माथिका ६ जना कैदी रहेका छन् । दरबन्दी अनुसारको स्वास्थ्यकर्मी पठाउन सम्बन्धित निकायमा ताकेता गरिरहेको कारागार प्रमुख योगीले बताउनुभयो ।

नवदीप श्रेष्ठ