समाचारहरू

जिल्ला कारागार पर्वतमा स्वास्थ्यकर्मी व्यवस्थापन गर्न अनौपचारिक क्षेत्र सेवा केन्द्र (इन्सेक) पर्वतले माग गरेको छ ।

पर्वतका प्रमुख जिल्ला अधिकारी नारायणप्रसाद सापकोटालाई इन्सेक पर्वत प्रतिनिधि सन्तोष थापाले चैत ३० गते ध्यानाकर्षण पत्र बुझाउदै कारागारमा स्वास्थकर्मी व्यवस्थापन गर्न अनुरोध गर्नुभएको हो ।

पर्वत कारागारमा स्वास्थ्य समूह चौथो तह अहेबको दरबन्दी रहेपनि २०७६ असोज देखि कुनै पनि स्वास्थ्यकर्मी हाजिर भएका छैनन् ।

२५ जनाको क्षमता भएको जिल्ला कारागार पर्वतमा ९० भन्दा बढी कैदी र थुनुवा रहेका छन् ।

कारागारमा स्वास्थ्यकर्मी नहँदा सामान्य बिरामीले समयमा उपचार पाउन सकेका छैनन् भने दिर्घ रोगी र जटिल प्रकृतिका बिरामीलाई नियमित स्वास्थ्य परीक्षणमा समस्या भएको छ ।

कारागारका चौकीदार लिलप्रसाद पौडेलले समयमा उपचार नपाउँदा समस्या परेको गुनासो गर्नुभयो ।

प्रमख जिल्ला अधिकारी सापकोटाले सम्बन्धित निकायमा तत्काल खबर गरेर स्वास्थ्यकर्मी व्यवस्थापनमा पहल गर्ने आश्वासन दिनुभयो ।

पर्वत कारागारका जेलर शिला श्रेष्ठले स्वास्थ्यकर्मीको समस्याका बारेमा  बिभागमा जानकारी गराइएको बताउनुभयो ।

सन्तोष थापा