समाचारहरू

२५ जना पुरुष र १५ जना महिला सहित ४० जना क्षमता भएको जिल्ला कारागार, दार्चुलामा पुरुष कक्षतर्फ झण्डै तीन गुणा बढी पुरुष कैदीबन्दी हुँदा कैदीबन्दीहरुलाई शौचालय प्रयोग गर्न नै समस्या भोग्नुपरेको छ । शौचालयका सेफ्टी टङ्याकी भरिएपछि कैदीबन्दीको लागि शौचालय जान समस्या भएको हो ।

कारागारमा अहिले ५८ जना कैदी र १५ जना थुुनुवा गरी ७३ जना कैदीबन्दी रहेको जिल्ला कारागारका जेलर केशवराज अवस्थीले जानकारी दिनु भयो । कैदीबन्दीको लागि ६ ओटा शौचालय भए पनि अधिकांशमा सेफ्टी टङ्यांकी भरिएपछि समस्या भएको छ ।

जेलर अवस्थीका अनुसार शौचालयको सेफ्टी टङ्याकी सफा गर्ने मेसिन जिल्लामा छैन् । विगतमा महाकाली नगरपालिकाको मेसिनले सफाई गर्ने गरिएकोमा अहिले त्यो बिग्रिएपछि समस्या भएको उहाँले बताउनु भयो ।

कारागारका चौकीदार पुष्करसिह कार्कीका अनुसार अहिले शौचालय जान पालो पर्खिनु पर्ने बाध्यता छ । खानेपानी अभाव भएको बेला दमकलमार्फत पनि पानीको समस्या समाधान भएको थियो । तर, शौचालय भरिएको कारण निकै समस्या भोग्नुपरेको उहाँले बताउनु भयो ।

०२२ सालमा निर्माण गरिएको कारागार र कार्यालय भवन जीर्ण छ । ६० वर्ष बढि भएको भवनमा बस्न पनि समस्या छ । उहाँले भन्नु भयो, भुकम्प आयो भने खतराको अवस्था छ । अहिले कारागारमा दुई जना ज्येष्ठ नगारिक कैदीबन्दी छन् ।

क्षमता भन्दा दोब्बर बढी कैदीबन्दी राखिएकोले कैदीबन्दीहरुलाई सुत्न तथा सरसफाईको समेत समस्या उत्पन्न भएको छ ।

नरेन्द्रसिह कार्की