समाचारहरू

तनहुँ कारागारमा पानीको अभाव भएपछि कैदीबन्दी समस्यामा परेका छन् । कारगारमा दैनिक ३५ हजार लिटर पानीको आवश्यकता पर्नेमा हाल दैनिक २० हजार लिटर मात्र आपूर्ति हुँदै आएको छ । पानीको अभावमा कारागारका कैदी बन्दीलाई समस्या परेको कारागारका प्रमुख नारायण अधिकारीले बताउनु भयो ।

मादी नदीको किनारमा इनार खनेर पानी आपूर्ति गरिँदै आएकोमा केही महिना यता नदीको गहिराई बढेर इनारमा पानी कम भएपछि पानीको आपूर्तिमा कमी आएको अधिकारीले बताउनु भयो । अब पानीको आपूर्ति बढाउन नयाँ इनार खन्नु पर्ने मात्र विकल्प रहेको अधिकारीले बताउनु भयो । अहिले जाडोको समयमा पानीको अभावले धेरै असर नगरेपनि गर्मी याम सुरु भएपछि भने निकै समस्या हुने भन्दै अधिकारीले यही जाडोको याममै पानीको आपूर्ति बढाउने विकल्प तयार गर्नु पर्ने उहाँको भनाई छ ।

कारागार निरिक्षणमा आएका निमित्त प्रमुख जिल्ला अधिकारी कमलराज भण्डारी समक्ष कारागार प्रमुख अधिकारीले पानीको व्यवस्थाको लागि अहिलेबाट नै काम गर्नु पर्ने विषय अवगत गराउनु भएको थियो । निमित्त प्रजिअ भण्डारीले पानीको समस्याको बारेमा कारागार व्यवस्थापन विभाग र गृहमन्त्रालयमा लेखी पठाउने बताउनु भयो ।

०८० मङ्सिर २५ गते कारागारकाे अवस्था बुझ्न जानुभएका इन्सेक प्रतिनिधि सँग पनि कारागारका प्रमुख अधिकारीले पानीको अभावको बारेमा सम्बन्धित निकायलाई ध्यानकर्षण गराइदिन अनुरोध गर्नु भएको थियो । मादी नदीबाट ल्याइएको  पानी नुहाउन, लुगा धुन, सरसफाई तथा शौचालयको लागि उपयोग गरिन्छ । पिउनकोलागि भने कारागार भित्र दमौली खानेपानी तथा उपभोक्ता संस्था मार्फत चार ओटा धारा जडान गरिएको छ ।

महिला तर्फ २० र पुरुष तर्फ १ सय १४ जनाको क्षमता रहेको तनहुँ कारागारमा महिला तर्फ २२ जना र पुरुष तर्फ २ सय ८० गरि जम्मा ३ सय २ जना कैदी बन्दी रहेका छन् । महिला कारागारमा आमासँग तीन जना बालिकाहरु पनि रहेको कारागार प्रमुख अधिकारीले जानकारी दिनु भयो ।

कारागारमा सबैभन्दा धेरै बलात्कार मुद्दाका ८६ जना कैदी बन्दी रहेका छन् । त्यसपछि क्रमशः लागु औषध मुद्दाका ५६ जना, कतव्र्य ज्यान मुद्दाका ५३ जना, चोरीका २७ जना, सवारी ज्यानका १९ जना कैदी बन्दी रहेका छन् ।

प्रकाशचन्द्र भट्टराई