समाचारहरू

कारागारमा क्षमता भन्दा दोब्बर बढी कैदीबन्दी रहँदा व्यवस्थापनमा समस्या भएको बन्दीहरूले गुनासो गरेका छन् ।

२० जना पुरुष र पाँच जना महिलाको क्षमता रहेको कारागारमा हाल ५४ जना पुरुष कैदीबन्दी रहेका छन् । पाँच जना महिला कैदी बन्दीको क्षमता भएपनि महिलातर्फ बस्ने कोठाको राम्रो व्यवस्था नहुँदा एक जना आश्रति बालकसहित एक जना बन्दी महिलालाई अन्य जिल्लामा पठाइएको कारागार शाखा प्रमुख तेजविक्रम शाहले बताए ।

बि.सं २०५१ सालमा निर्माण भएको कारागारमा कैदी र थुनुवाका लागी दुई वटा सुत्ने कोठा रहेको छ भने शौचालय पनि दुई वटा रहेका छन् । क्षमता भन्दा दोब्बर बढी कैदीबन्दी भएको हुँदा एउटा कोठामा २७ जनासम्म कोचाकोच भएर सुत्नु परेको कारागारका नाइके दिपक चन्दले गुनासो गरे । नाइके चन्दले भने-'शौचालय प्रयोगमा लाइन बस्नु पर्छ भने धाराको प्रयोगमा समेत समस्या भएको छ ।'

कारागार भवनको अवस्था निकै कमजोर भएको र ठाउँ ठाउँमा भवन चर्किएको छ । कारागार भित्र रहेका कैदी तथा थुनुवाले मनोरञ्जनका सामग्री केही नभएको बताएका छन् । बिरामी हुँदा समयमा उपचार व्यवस्था हुन नसकेको र कारागारभित्र कुनै पठनपाठनका लागि पुस्तक समेत नभएको कारागारका नाइके दिपक चन्दले आरोप लगाए ।

नाइके चन्दले भने-'भवन पनि निकै जोखिम अवस्थामा छ । भवनको चारैतिर दिवाल चर्किएको छ । पानी पर्दा छतबाट पानी चुहिने समस्या भएकाले सुत्न सकिँदैन ।'

दिनेशकुमार श्रेष्ठ