समाचारहरू

मानव बेचबिखनको आरोपमा पुर्पक्षका लागि थुनामा रहेको बेलामा कारागारबाट भागेकी जुगल गाउँपालिका-५ स्थित बराम्ची स्थायी घर भएकी २५ वर्षीया कविता घिमिरेलाई प्रहरीले ०७९ माघ २४ गते काठमाडौँको जडिबुडिबाट गिरफ्तार गरेको छ ।

घिमिरेलाई प्रहरीले माघ २४ गते जिल्ला अदालत दाखिला गरी कैद असुल उपरका लागि सोही दिन चौतारा कारागार चलान गरेको जिल्ला प्रहरी कार्यालयका इन्स्पेक्टर हरिबोल के.सी.ले बताउनु भयो ।

घिमिरे ०७२ वैशाख १२ गतेको भूकम्पले चौतारा कारागार भत्कीएपछि सोही बेलादेखि फरार भएकी थिइन् ।

कारागारबाट फरार भएकी घिमिरेलाई जिल्ला अदालतको ०७२ फागुन १२ गते ९ वर्ष कैद सजाय र ५० हजार रुपैयाँ जरिवानाको सजाय सुनाएको थियो ।

त्यसैगरी जिल्ला अदालतले ०७४ फागुन ९ गते अर्को फैसला सुनाउँदै कैदी भागे वा भगाएको मुद्दामा चार वर्ष ६ महिना कैद सजाय समेत गरेको थियो । हाल कविता घिमिरेलाई दुई ओटा मुद्दाको कैद सजाय भएको छ ।

कारागारबाट फरार भएकी घिमिरेले तत्कालीन गुम्बा गाविस-२ हाल जुगल गाउँपालिका-३ की १८ वर्षीया युवतीलाई बिक्रि गर्ने उद्देश्यले काठमाडौँ लैजान लागेको अवस्थामा मानव बेचविखन विरुद्ध काम गर्ने एक गैरसरकारी संस्थाको सूचनाको आधारमा ०७१ जेठ ६ गते बन्देउबाट प्रहरीले गिरफ्तार गरेको थियो ।

पीडितले ०७१ जेठ ७ गते कविता घिमिरे र गुम्बा स्थित गुण्डेगाउँ घर भएका राम तमाङविरुद्ध जिल्ला प्रहरी कार्यालयमा उजुरी दिएकी थिइन् । पीडितले दिएको उजुरीमा राम तमाङले आफ्नो नागरिकतामा उमेर बढाउन कविता घिमिरेसँग साथ लगाएर सदरमुकाम चौतारा पठाएको उल्लेख छ । राम तामाङ हालसम्म फरार रहेका छन् ।

नातिबावु धिताल