समाचारहरू

बलात्कारको आरोपमा पुर्पक्षका लागि राजविराज कारागारमा थुनामा रहेका हनुमाननगर कंकालिनी नगरपालिका–६ का १९ वर्षीय देबेन्द्र मण्डल माघ २८ गते मृत अवस्थामा फेला परेका प्रहरीले जनाएको छ ।

मण्डलको शव कारागारभित्र शौचालयमा झुण्डिएको अवस्थामा माघ २८ गते विहान फेला परेको राजविराज कारागारले जनाएको छ ।

१५ वर्षीया बालिकालाई २०८० साउन १३ गते राति अपहरण गरी बलात्कार गरेको आरोपमा मण्डल भदौ ११ गतेदेखि पुर्पक्षका लागि कारागारमा थुनामा रहेको कारागार प्रशासनले जनाएको छ ।

जिल्ला प्रहरी कार्यालयले साउन १७ गते गिरफ्तार गरी साउन १८ गते बलात्कारको उजुरी दर्ता गरेको थियो । जिल्ला अदालतमा भदौ १० गते अभियोग पत्र दायर भएकोमा न्यायाधीश हर्कबहादुर क्षेत्रीको इजलाशले भदौ ११ गतेदेखि आरोपित पुर्पक्षका लागि राजविराज कारागारमा थुनामा थिए । फैसला हुन बाँकी रहेको थियो ।

पासोमा झुण्डिएर आत्महत्या गरेका मण्डलको परिवारलाई घटना थाहा पाएलगत्तै कारागारले जानकारी दिएको र परिवारका सदस्यहरु आएपछि शवको मुचुल्का गरिने निमित्त कारागार प्रशासक सदानन्द दासले फोनमार्फत इन्सेक सप्तरी प्रतिनिधिलाई बताउनु भयो ।

मनोहरकुमार पोखरेल