समाचारहरू

भीमफेदी गाउँपालिका-३ क्षेत्रीय कारागार भीमफेदीमा अज्ञात रोगबाट ०८० जेठ ८ गते ३० जना कैदी बन्दी एकैपटक बिरामी परेका छन् ।

कारागारको ‘क’ ब्लकमा रहेका कैदी बन्दीमा ज्वरो आउने, पखाला लाग्ने, शरीर काँप्ने, पेट दुख्ने र शरीर कमजोर भएको महसुस हुने समस्या देखिएको कारागार प्रशासक उपसचिव तीर्थ पौडेलले जानकारी दिनुभयो ।

कारागार प्रमुख पौडेलका अनुसार बिहान १० जना बिरामी भएपछि नजिकैको भीमफेदी स्वास्थ्य केन्द्रमा उनीहरूको उपचार गरिएको थियो ।

‘दिनभर बिरामीको सङ्ख्या बढेपछि अहिले गाउँपालिका र स्वास्थ्य केन्द्रको सहयोगमा हामीले कारागारमै उपचार गरिरहेका छौँ,’ उहाँले भन्नुभयो ।

पौडेलका अनुसार दुई जना डाक्टरसहित आठ जना स्वास्थ्यकर्मी अहिले कैदी बन्दीको उपचार गरिरहेका छन् ।

‘विषाक्त खानाको कारण बिरामी भएको हो कि भनेर हामीले परीक्षण गर्‍यौँ । तर, त्यस्तो केही पाइएन,’ पौडेलले भन्नुभयो ।

कारागारमा हाल १ हजार १ सय ८ जना कैदी बन्दी रहेका छन् । कारागारमा एक/एक जना अहेब र अनमीको दरबन्दी भए पनि हालसम्म स्वास्थ्यकर्मी छैनन् ।

पुष्पराज अधिकारी