समाचारहरू

दिक्तेल रूपाकोट मझुवागढी नगरपालिका–१ का २९ वर्षीय पत्रकार दिवस रिजालले स्वच्छ र शान्त वातावरणमा काम गर्ने वातावरण मिलाइदिन पत्रकार महासङ्घ खोटाङ शाखा समक्ष माघ ९ गते आग्रह गर्नु भएको छ ।

माघ ४ गते दिक्तेल रूपाकोट मझुवागढी नगरपालिकाका उपमेयर विसन राईका बारेमा जायजुम अनलाइनमा “उपप्रमुखको ८ महिनामा करिब ५ लाख भुक्तानी” शीर्षकको समाचारलाई लिएर उपप्रमुख राईले दिएको धम्की पछि काम गर्ने वातावरण मिलाइ दिन महासङ्घ शाखा समक्ष आग्रह गरेको पीडित पत्रकारले इन्सेककर्मीसँग बताउनु भयो ।

माघ ९ गते घटनाका विषयमा प्रष्टीकरण लेखि महासङघ खोटाङ शाखामा बुझाएको र काम गर्ने वातावरणका लागि आग्रह गरेको पत्रकार रिजालले बताउनु भयो ।

माघ ४ गते समाचार प्रकाशनपछि दिक्तेल रूपाकोट मझुवागढी नगरपालिका–१४ वुइपाका ४० वर्षीय उपमेयर विसन राईले आफ्ना स्वकीयलाई घरमा पठाएर आफूलाई अपहरणको शैलीमा लगि आफ्नो कार्यकक्षमा अपशब्द र ज्यान मार्ने धम्की दिएको आरोपमा पत्रकारको छ ।

घटनाका विषयमा नेपाल पत्रकार महासङ्घ खोटाङ शाखाले माघ ६ गते विज्ञप्ति जारी गरी दोषीलाई कारबाही गर्न माग गरेको छ ।

शाखा अध्यक्ष दिलिप खत्रीद्वारा जारी विज्ञप्तिमा उपमेयरले समाचारको विषयमा चित्त नबुझे कानुनी उपचारको बाटो रोज्नु पर्नेमा तुच्छ वचन र अपशब्द प्रयोग गरी पत्रकारलाई गरेको व्यवहारमा खेद प्रकट गरिएको छ ।

प्रेस चौतारी नेपाल खोटाङ अध्यक्ष सीताराम राईद्वारा माघ ७ गते विज्ञप्तिमा प्रेस स्वतन्त्रताको रक्षा गर्न माग गरिएको छ ।

घटनाका विषयमा प्रेस चौतारी नेपाल प्रदेश १, कमिटि महासचिव गोपाल झापालीद्वारा माघ ८ गते जारी विज्ञप्तिमा घटनाका दोषीलाई कारबाही र श्रमजीवी पत्रकारलाई काम गर्ने वातावरण बनाउन माग गरिएको छ ।

घटनाका विषयमा उपमेयर विसन राईले माघ ५ गते पत्रकार सम्मेलन गरी आफूले पत्रकारलाई दुर्व्यवहार नगरेको बताउनु भएको छ ।

मानव अधिकार रक्षकसम्बन्धी घोषणापत्र सन् १९९८ ले पत्रकारलाई मानव अधिकार रक्षकका रूपमा परिभाषित गरेको छ ।

तारानाथ फुयल