समाचारहरू

खार्पुनाथ गाउँपालिका–३ स्थित राया र कारङगा गाउँको बिच खोलामा पर्ने काठेपुल अविरल वर्षाले बगाएपछि दुई महिनाभन्दा बढी समयदेखि विद्यार्थीहरू विद्यालय जानबाट वञ्चित भएका छन् ।

अविरल वर्षाका कारण करङ्गा खोलामा आएको बाढी पहिरोले काठको पुल बगाएपछि असारबाट विद्यार्थीहरू विद्यालय जान नसकेको स्थानीयबासी सिंगवीर सुनारले बताए ।

खोलाले काठको पुल बगाउँदा कारङगा गाउँका ६० घरधुरीका ३० जना विद्यार्थीलाई आवतजावतमा समस्या हुँदै आएको स्थानीयबासी सिंगवीरले जानकारी दिए ।

साविकको राया गाविसले सो खोलामा पुल निर्माणका लागि ५० हजार रुपियाँ विनियोजन गरी काठेपुल लगाएपछि विद्यार्थीहरू आवतजावत गर्ने गरेका थिए ।

काठको पुल बनाएपनि लगातार परेको अविरल वर्षाले खोलामा पानीको सतह बढेपछि उक्त काठे पुल बगाएको खार्पुनाथ गाउँपालिका–३ का स्थानीयबासी जगत शाहीले बताए ।

पटकपटक पक्की पुल निर्माणको लागि जिल्ला सांसद, पूर्व खानेपानी तथा सरसफाई मन्त्री, पूर्व सांसद समक्ष समस्या राख्दा पनि सुनुवाइ नभएको स्थानीयबासीले गुनासो गरेका छन् । दुई पटकसम्म जनश्रमदानबाट निर्माण गरिएको पुल खोलाले बगाएपछि बालबालिका विद्यालय जानबाट वञ्चित भएको अर्का स्थानीयबासी विष्णुबहादुर शाहीले बताए ।

घरबाट बिहानको ७ बजे खाना खाएर हुम्ला मावि राया विद्यालयमा हिँडेका विद्यार्थी कहिल्यैै समयमा विद्यालय पुग्न सक्दैनन् । खोला तर्न नसक्दा कोही बाटो हिँड्ने बटुवा भेटिएर सहयोग गरेमा विद्यालय जाने र नसके घर फकर्ने गरेको कक्षा ९ मा अध्यनरत देवकी शाहीले गुनासो गरिन् ।

विद्यालय समयमा नपुग्दा शिक्षकबाट सजाय हुने गरेको हुम्ला माध्यमिक विद्यालयकी छात्रा विनिता शाहीले गुनासो गरिन् ।

पटकपटक काठले बनाएको पुल बगाएपछि गाउँपालिकालाई बेलिब्रिजको माग गर्दै आएका थिए । काठको पुल पटकपटक बगाएपछि बेलीबिज्र दिगो रहने सम्भावना देखिएको स्थानीय धान्ने सुनारले बताए । तर, यसको अहिलेसम्म पनि गाउँपालिकाले सुनुवाइ नगरेको सुनारको भनाई छ ।

नन्द सिंह