समाचारहरू

स्थानीय तहको निर्वाचन प्रचारप्रसारका क्रममा नेपाली काङ्ग्रेस र नेकपा माओवादी केन्द्रका कार्यकर्ताबिच सानोभेरी गाउँपालिका-२ चाइनाबगर गाउँमा वैशाख २६ गते साँझ सात बजे झडप हुँदा दुवै पक्षका ६ जना कार्यकर्ता सामान्य घाइते भएका छन् ।

चुनाव प्रचारको क्रममा माओवादीका कार्यकर्ताले अवरोध गर्न खोजेपछि झडप भएको नेपाली काङ्ग्रेसका सानोभेरी गाउँपालिका अध्यक्षका उम्मेदवार गोरख चन्दले जानकारी दिए । चुनाव प्रचार गर्न नदिन ठाउँठाउँमा माओवादी केन्द्रका कार्यकर्ताले आफूहरूलाई अवरोध गर्न खोजेको काङ्ग्रेसका उम्मेदवार चन्दको आरोप छ ।

झडपलाई नियन्त्रणमा लिन प्रहरीले दुई राउण्ड हवाइ फायर गरेको र सो क्रममा एक जना म्यादी प्रहरी र दुई जना प्रहरी जवान सामान्य घाइते भएको जिल्ला प्रहरी कार्यालय रुकुमका डिएसपी अङ्गुर जिसीले बताए ।

वैशाख २५ गते सर्वदलीय बैठक बसेर दलहरू बीच कुनै प्रकारका झडप नगर्ने सहमति भए पनि सो पालना हुन सकेको छैन ।

आदर्श केसी