समाचारहरू

सिम्ता गाउँपालिका–६ रिसिडाँडामा वैशाख २७ गते राति करिब ११ बजे नेकपा एमाले र काङ्ग्रेसका कार्यकर्ताबीच भएको झडपमा सोही ठाउँ निवासी एमाले कार्यकर्ता ३६ वर्षीय सुनिल विक र २४ वर्षीय इन्द्रबहादुर सुनार घाइते भएका छन् ।

घाइते दुबैलाई उपचारका लागि नेपालगञ्ज मेडिकल कलेज नेपालगञ्ज लगिएको छ ।

झडपलाई नियन्त्रण गर्न पुगेको प्रहरीको टोलीले सोही ठाउँ निवासी एमाले कार्यकर्ता ५० वर्षीय पूर्ण बहादुर शाही, उनकी पत्नी होमकुमारी शाही र स्थानीयबासी दिपा शाहीलाई कुटपिट गरेको सिम्ता गाउँपालिकाका अध्यक्ष कविन्द्र केसीले आरोप लगाउनु भयो ।

जिल्ला प्रहरी कार्यालय, सुर्खेतका डीएसपी रामप्रसाद घर्तीले काङ्ग्रेस र एमालेका कार्यकर्ताबीच झडप भएको थाहा पाई घटनास्थलमा सम्झाउन जादा प्रहरीसँगको धकलपकलबाट दुई जना स्थानीयबासी सामान्य घाइते भएको प्रतिकृया दिनु भयो ।

काङ्ग्रेस कार्यकर्ताको आक्रमणबाट आफ्ना कार्यकर्ता घाइते भएको केही समयमा आएको प्रहरीले एमालेका कार्यकर्ताको घरघरमा पुगी कुटपिट गरेको एमालेका जिल्ला सचिव तथा सिम्ता गाउँपालिका अध्यक्ष कविन्द्र केसीले आरोप लगाउनु भयो ।

डीएसपी सूर्य थापाको अगुवाईमा आएको टोलीले एमालेका कार्यकर्तालाई कुटपिट गरेको भन्दै एमालेले घटनामा संलग्न डीएसपी थापालाई तत्काल सरुवाको माग गरेको छ । डीएसपी थापाको सरुवा नभए निर्वाचन हुन नदिने एमाले जिल्ला सचिव कविन्द्र केसीले बताउनु भयो ।

प्रमुख जिल्ला अधिकारी खगेन्द्र रिजालका अनुसारका घटनाका विषयमा सहायक प्रमुख जिल्ला अधिकारी इश्वरीप्रसाद पाण्डेको संयोजकत्वमा तीन सदस्यीय छानविन समिति गठन गरिएको छ । छानविन समितिमा सिम्ता गाउँपालिकाका प्रमुख प्रशासकीय अधिकृत र अनुसन्धान इन्स्पेक्टर रहेको प्रजिअ रिजालले जानकारी दिनु भयो ।

पूर्णबहादुर खड्का