कांग्रेस अधिवेशनको क्रममा निर्वाचन अधिकृतमाथि कुटपिट

 

मलङ्गवा नगरपालिका–८, सर्लाहीस्थित नेपाली कांग्रेसको वडा अधिवेशनका लागि निर्वाचन अधिकृत खटाउने विषयमा पार्टीका कार्यकर्ताबिच भएको झडपमा अधिवेशनका लागि तोकिएका निर्वाचन अधिकृत दिवाकरराज पाण्डेलाई कुटपिट गरेको पीडितले आरोप लगाउनु भएको छ ।

वडा अधिवेशनका लागि गरिएको छलफलका क्रममा मङ्सिर २ गते पार्टी सभापति शेरबहादुर देउवा पक्षका कार्यकर्ता र वरिष्ठ नेता रामचन्द्र पौडेल पक्षका कार्यकर्ताबिच पार्टी कार्यालय मलङ्गवामा झडप भएको थियो ।

सर्लाही जिल्लामा सभापति देउवा र वरिष्ठ नेता पौडेल पक्षधरका कार्यकर्ताबिच क्रियाशील सदस्यता वितरण देखिनैै विवाद रहँदै आएको केन्द्रीय सदस्य शम्भुलाल श्रेष्ठले जानकारी दिनुभयो ।

आरोपितहरूले पाण्डेलाई कुटपिट गरी उहाँसँग रहेको निर्णय पुस्तिका, अन्य कागजातहरू र मोवाइल लुटेर लगेको पीडित पक्षको आरोप छ ।

उक्त घटनामा संलग्न व्यक्तिहरूलाई आवश्यक कारवाहीका लागि सम्बन्धित पक्षसँग जोडदार माग गरेको पार्टीका सर्लाही जिल्ला सभापति नागेन्द्रकुमार यादवले प्रेस विज्ञप्तिमार्फत आग्रह गर्नु भएको छ ।

कुटपिटका कारण सामान्य घाइते हुनु भएका पाण्डेको उपचार जिल्ला अस्पताल मलङ्गवामा सोही दिन गरिएको पीडितले इन्सेक प्रतिनिधिलाई बताउनु भयो ।


बुधन साह