कांग्रेसको वडा अधिवेशनमा झडप हुँदा दुई जना घाइते

  ०७८ मङ्सिर १४ गते

बलरा नगरपालिका–९ स्थित अचलगढमा मङ्सिर १२ गते नेपाली कांग्रेसको वडा अधिवेशनमा विवाद हुँदा भएको झडपमा दुई जना घाइते भएका छन् ।

प्रदेश २ सरकारका महिला, बालबालिका, युवा तथा खेलकुद मन्त्री विरेन्द्रप्रसाद सिंहका पिएसओ बलरा नगरपालिका–४ निवासी ३२ वर्षीय रामचन्द्र खडका र बलरा नगरपालिका–९ निवासी कांग्रेस कार्यकर्ता ३७ वर्षीय रामचन्द्र महतो घाइते भएको खेलकुद मन्त्री सिंहले जानकारी दिनु भएको छ ।

वडा अधिवेशनका सम्बन्धमा छलफल भइरहेका बेला प्रदेश मन्त्री सिंह पुगे पश्चात उहाँले असन्तुष्टि जनाएपछि दुई पक्षबिच विवाद हुँदा प्रदेश मन्त्रीका अङ्गरक्षकले हवाई फायर गरेको स्थानीय कार्यकर्ता राम सिंहको आरोप छ ।

16 days campaignNepali

वडा अधिवेशनमा धाँधली भएको भनेर विरोध गरेपछि सांसद अमरेशकुमार सिंहका तर्फबाट आफूसहित पिएसओमाथि रडले आक्रमण गरेको र आक्रमणमा परी पिएसओ खडकासहित दुई जना घाइते भएको प्रदेश मन्त्री विरेन्द्रप्रसाद सिंहले बताउनु भयो ।

टाउकोमा चोट लागेका दुवै जनाको उपचार जिल्ला अस्पताल मलङ्गवामा मङ्सिर १२ गते गरिएको छ ।


बुधन साह