समाचारहरू

चन्दननाथ नगरपालिका–८ बाट काँग्रेसका वडाध्यक्ष उम्मेदवार रुपबहादुर रोकायाले पार्टीभित्र अन्तरघात गरेको आरोपमा सोही ठाउँका काँग्रेस कार्यकर्ता कुमार शाही र कमल बोहरालाई वैशाख ३१ गते घरभित्र थुनेर कुटपिट गरी घाइते बनाएको पीडित पक्षले आरोप लगाएका छन् ।

काँग्रेसका वडाध्यक्ष उम्मेदवार रोकायाले पार्टीभित्र अन्तरघात गरी भोट नहालेको र धोका दिएको भन्दै कुटपिट गरेको कुमारबिक्रम शाहीले आरोप लगाउनु भएको छ । घाइतेको उपचार कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा भइरहेको छ ।

वडाध्यक्षका उम्मेदवार रोकायाका भाई कृष्ण रोकाया, सोही वडाका बसन्त धराला, देवि धराला, बिर्ख रोकाया सहितका व्यक्तिले सामुहिक रुपमा कुटपिट गरेका भन्दै पीडित पक्षले जेठ १ गते जिल्ला प्रहरी कार्यालयमा घाउकेस जाँच तथा कारवाही गरीपाँऊ भन्दै निवेदन दिएको उहाँले जानकारी दिनु भएको छ ।

उहाँले भन्नु भयो “आफ्नो नेता तथा उम्मेदवार (रुपबहादुर रोकाया) लाई सहयोग गर्न भन्दै भारतबाट जुम्ला आए । तर पार्टीमा अन्तरघात गरेको भोट नहालेको आरोपमा कुटाई खानु प¥यो ।”

वडाध्यक्ष उम्मेदवार रोकायाले फोन गरेर काम छ भन्दै बोलाए । आफूसहित चार जनाको संख्यामा रहेका व्यक्तिले उमगाडमा पु¥याई कुटपिट गरेको र पछि घरमा छलफल गरौला भन्दै घरभित्र थुनेर सामुहिक रुपमा कुटपिट गरेको भन्दै पीडित पक्षले प्रहरीमा उजुरी दिएका छन् ।

आफुलाई भोट किन नहालेको भन्दै धन्नै मारिसकेका थिए, ज्यान जोगाईदिन भन्दै कमल बोहरा र घाइते कुमार विक्रम शाहीका पत्नी नानु शाही जिल्ला प्रहरी कार्यालय पुग्नु भएको छ । जिल्ला प्रहरी कार्यालयका अनुसार घाइते कुमार विक्रम शाहीको घाउ केस जाँच गर्न अस्पतालमा पठाईएको र घटनाको अनुसन्धान गरिने बताएको छ ।

वडाध्यक्षका उम्मेदवार रोकायाले भने अन्तरघात गरेको शंका लागेपछि कुटपिट गरेको होइन । गाली गरेको हुँ । निर्वाचन अघि सहयोग समर्थन गरौला भनेर वडाध्यक्षको उम्मेदवार बनाउने । अन्तमा आएर अन्तरघात गर्न खोजेपछि रिसको आवेगमा गाली गलोज गरेको हुँ ।

मानदत्त रावल