काँगेस र माओवादी कार्यकर्ता बीच झडप, ६ जना घाइते

  ०७९ जेठ १ गते

तातोपानी गाउँपालिका–३ तिलाकोटस्थित मतगणना स्थल नजिक काँग्रेस माओवादी केन्द्रका कार्यकर्ता बीच झडप हँुदा ६ जना घाइते भएका छन् ।

घाइते हुनेमा सोही वडाका २४ वर्षीय प्रेमसागर रावल, ५० वर्षीय रामदेवि रावल, १८ वर्षीय धर्मराज रावल, २१ वर्षीय अजित कामी र २१ वर्षीय प्रकाश सुनार रहेका छन् । सोही गाउँपालिका १ वाईराका १५ वर्षीय गणेश शाही पनि घाइते भएका छन् ।

घाइतेको कर्णाली स्वास्थ्य विज्ञान प्रतिष्ठान शिक्षण अस्पताल, जुम्लामा उपचार भइरहेको छ । प्रेमसागरको टाउको, गणेशको टाउको, रामदेविको वाया खुट्टा, धर्मराजको बाँया कान र आखा नजिक, अजितको ढाड र प्रकाशको टाउकोमा चोट रहेको अस्पताल प्रहरी यूनिटले जनाएको छ । घाइते मध्ये प्रेमसागर रावल र गणेश शाही अस्पतालबाट डिस्चार्ज भएको डिएसपी नरेन्द्र चन्दले बताउनु भयो ।

मतगणनाको विषयलाई लिएर माओवादी केन्द्र र नेपाली काँग्रेस कार्यकर्ताबीच विवाद भई ढुंगा हानाहान भएपछि केही समय मतगणना कार्य प्रभावित भएको थियो ।

तातोपानी गाउँपालिका–३ को वडाध्यक्षसहितको मतगणना नतिजा सार्वजनिक भएपछि माओवादी केन्द्र र नेपाली काँग्रेसका कार्यकर्ता तथा समर्थकबीच विवाद भएको हो । विवादका क्रममा माओवादी पक्षले ढुंगा प्रहार गरेको काँग्रेस कार्यकर्ताको आरोप छ ।

वडाअध्यक्षमा नेपाली काँग्रेसका गोकर्ण रावल विजयी भएको निर्वाचन अधिकृतको कार्यालयले जनाएको छ । उक्त वडामा रावलले ४ सय ३३ मत प्राप्त गरी विजयी भएका छन् भने माओवादीका उम्मेदवार डिल्ली रावलले ३ सय ६४ मत प्राप्त गरेका छन् ।

वडाध्यक्षमा पराजित माओवादीका उम्मेदवार डिल्ली रावलसहित ८ जनालाई पक्राउ गरिएको डिएसपी चन्दले बताउनु भयो । उहाँले भन्नुभयो घटनाका विषयमा अनुसन्धान भइरहेको छ ।
JumlaPhoto_2022-05-15..


मानदत्त रावल