समाचारहरू

मष्टा गाउँपालिका–२ खिकालाकी १२ वर्षीया बालिका सम्झना कामीलाई ०७७ असोज १० गते बलात्कारपछि हत्या घटनाका कसुरदार मष्टा गाउँपालिका–२ का १८  वर्षीय राजेन्द्र बोहराका आफन्तले आफूहरुलाई विभिन्न समयमा धम्की दिदै आएको पीडित परिवारले गुनासो गर्नु भएको छ ।

बलात्कार गरी हत्या गरेको कसुरमा बाल सुधार गृहमा राखिएका १८ वर्षीय राजेन्द्रका आफन्त जुस्या भनिने रवि बोहराले असार २२ गते राति त डुमका कारण मेरो परिवारलाई बिना कारण कार्वाही भयो भनेर सम्झनाका हजुरवुबा गोरख कामीलाई कुटपिट तथा दुर्व्यवहार गरिएको पीडितका आफन्त इश्वर बि.क.ले इन्सेक प्रतिनिधिसँग फोनमा बताउनु भयो ।

बलात्कारपछि हत्या गरिएकी सम्झनाका काका विकास बिकले कसुरदार बोहराका परिवारका सदस्यहरुले आफूहरुलाई पटक पटक धम्की दिने, हातपात गर्ने र घर मै आएर कुटपिट गर्ने गरेको समेत दुखेसो पोख्नु भयो ।

०७९ असार २२ गते अपशब्द प्रयोग गरी हातपात समेत गरिएकोले रवि बोहराका विरुद्ध पीडित पक्षले असार २३ गते मष्टा गाउँपालिकाको न्यायीक समितिमा उजुरी दिएका थिए ।

पीडित परिवारलाई गालिगचौज तथा हातपात गरेको उजुरी न्यायीक समितिमा आएपछि दुबै पक्षलाई असार २३ गते कार्यालयमा बोलाएर छलफल गर्दा आरोपित बोहराले आफू भारतमा रहेकाले घटनाको वास्तविकता थाहाँ नहुँदा गालिगलौज गरेको स्विकार गर्दै उपरान्त गल्ती नगर्ने भन्दै माफी मागेपछि मिलापत्र भएको मष्टा गाउँपालिकाका अध्यक्ष ज्ञानबहादुर बोहराले इन्सेक प्रतिनिधिसँगको फोन सम्पर्कमा बताउनु भयो ।

सम्झनाका काका विकास विकले बेलाबखत आफूहरुलाई कुटपिट, गालिगलौज र धक्की दिइदै आइएकोले त्रसदीपूर्ण जिवन बाँच्नु परेको बताउनु भयो ।

दुई वर्ष अगाडी सम्झना कार्मीलाई बलात्कार गरी हत्या गरिएको थियो । बलात्कारपछि हत्या गरेको कसुरमा १८ वर्षीय बोहरालाई जिल्ला अदालतको आदेशमा बाल सुधार गृह, डोटीमा राखिएको छ ।

सत्यराज सिंह